Xəbərlər
21.05.2026, 22:20
Lilpar Cəmşidqızı : Bomboş görünür xanə desəm, doğru sayılmaz (QƏZƏL)
QƏZƏL
Ey dil, sənə biganə desəm, doğru sayılmaz,
Aşiq kimi divanə desəm, doğru sayılmaz.
Eşqin odu yandırmış əzəldən səni billəm,
Yanmış külə pərvanə desəm, doğru sayılmaz.
İsbat elədin sevgini, könlümdə qalan var,
Can mülkinə viranə desəm, doğru sayılmaz.
Bənzətmə dedim ruhumu Leylayə, solarsan,
Hər maziyə əfsanə desəm, doğru sayılmaz.
Bir tel qoparıb ruhumu incitmə demişdim,
Halın dəyişib şanə, desəm, doğru sayılmaz.
Kasəndə daşan qan dolanır könlümə axsın,
Beynimdədi peymanə desəm, doğru sayılmaz.
Məşuqliyə talib olanın sərvəti qəmdir,
Can olmadı *kaşanə desəm, doğru sayılmaz.
Cənnət yaradıbsan, içi gül, qəmzəsi nərgiz,
Qəlbimdə solub nanə desəm, doğru sayılmaz.
Lilpar kimi sevmək ola kaş hər kəsə qismət,
Bomboş görünür xanə desəm, doğru sayılmaz.
*Kaşanə- imarət Yığcam Göstər
Son xəbərlər
Ən çox oxunanlar
- Bu gün
- Bu həftə
- Bu ay
