Stomatoloq, "MİA.RF" klinikalar şəbəkəsinin tibbi direktoru Maksim Labuxin xəstə diş və diş ətlərinin ürək, beyin və ümumilikdə orqanizmə ciddi mənfi təsirləri barədə xəbərdarlıq edib.

O, bu barədə Gazeta.Ru-ya müsahibəsində danışıb.

Labuxinin sözlərinə görə, parodontit kimi diş əti xəstəlikləri insult, hipertoniya (yüksək qan təzyiqi) və ateroskleroza səbəb ola bilər. Buna səbəb ağız boşluğundakı bakteriyaların qana keçərək bütün bədənə yayılmasıdır.

"Ümumiyyətlə, qidaları çeynəyərkən və ya dişləri təmizləyərkən bakteriyalar orqanizmə daim daxil olur. Lakin sağlam insanın immuniteti onları tez bir zamanda zərərsizləşdirir. İllərlə iltihablı qalan diş ətlərində isə bakteriyalar tez-tez hücuma keçərək patologiyalara yol açır.

Bakteriyaların hücumuna cavab olaraq damar divarı iltihablanmağa başlayır və bütün orqanizmdə iltihab prosesi güclənir. Beləliklə, ağızdakı infeksiya damarları sıradan çıxarır və ürəkdə ciddi problemlərin yaranma riskini artırır.

Bundan başqa, diş və diş ətlərindəki daimi ağrılar səbəbindən insan qidanı yaxşı çeynəyə bilmir. Nəticədə mədə və bağırsaqlar dəfələrlə daha intensiv işləmək məcburiyyətində qalır ki, bu da həzm problemlərinə gətirib çıxarır", – deyə həkim izah edib.

Labuxin vurğulayıb ki, insan illərlə qastriti dərmanlarla müalicə edə bilər, lakin əsl səbəbin parodontit olduğu üzə çıxar.

РесурсFacebookWhatsAppTelegram