Almaniya xarici tələbələr üçün dünyanın ən populyar təhsil ölkələrindən biri statusunu qoruyur.

AZƏRTAC “Spiegel” nəşrinə istinadla xəbər verir ki, bu barədə UNESCO-nun yeni araşdırmasında qeyd olunub. Araşdırmaya əsasən, Almaniya ABŞ, Böyük Britaniya və Avstraliyadan sonra əcnəbi tələbələrin ən çox üstünlük verdiyi dördüncü ölkədir.

Əcnəbi tələbələrin 12 faizi təhsil almaq üçün Almaniyanı seçib. Avropalı tələbələr arasında isə Almaniya başqa bir Avropa ölkəsində təhsil üçün ən populyar istiqamət hesab olunur. Sonrakı yerlərdə Fransa və Niderland qərarlaşıb.

Hazırda Almaniyanın ali təhsil müəssisələrində təxminən 400 min xarici tələbə və doktorant təhsil alır. Alman Akademik Mübadilə Xidmətinin (DAAD) araşdırmasına görə, ölkənin texnoloji liderliyi, ingilisdilli proqramların genişliyi, həmçinin beynəlxalq müqayisədə daha aşağı təhsil və yaşayış xərcləri Almaniyanı xarici tələbələr üçün cəlbedici edir.

Federal Statistika İdarəsinin məlumatına əsasən, 2024-cü tədris ilində universitetlərə ilk dəfə qəbul olunanlar arasında əcnəbilərin payı 30 faizə yaxınlaşıb. Xarici tələbələr arasında xüsusilə təbiət elmləri və riyaziyyat istiqamətlərinə maraq artıb.

UNESCO araşdırmasına görə, təhsil almaq üçün xarici ölkələrə üz tutan tələbələrin sayı 2000-ci ildəki 2,1 milyondan 2023-cü ildə 7,3 milyona çatıb. Bununla belə, dünyada tələbələrin yalnız 3 faizi təhsil üçün xaricdə oxumaq imkanı əldə edir və bu göstərici üzrə regionlar arasında ciddi fərqlər var.