Aprelin 19-da Gənclər və İdman Nazirliyinin Voleybol Mərkəzində qadın voleybolçuların Yüksək Liqasının mükafatlandırma mərasimi keçirilib.

Turaztv.az AZƏRTAC-a istinadən xəbər verir ki, mərasimdə gənclər və idman naziri Fərid Qayıbov, Dövlət Gömrük Komitəsinin sədri, Azərbaycan Voleybol Federasiyasının (AVF) prezidenti Şahin Bağırov iştirak ediblər.

Tədbirdə çıxış edən Ş.Bağırov komandalara yüksəksəviyyəli iştirakına görə təşəkkür edib, onların əzmkarlıq göstərdiyini qeyd edib. Bu idman növünə göstərilən diqqət və qayğıdan bəhs edən Ş.Bağırov yeni idmançıların yetişdiyini, komandaların sayının çoxaldığını diqqətə çatdırıb. Çıxışının sonunda qalibləri təbrik edən AVF-nin prezidenti onlara yeni-yeni uğurlar arzulayıb.

Sonra oyunçulara müxtəlif nominasiyalar üzrə mükafatlar təqdim edilib, mövsümün rəmzi komandasında yer alan fərqli komanda üzvləri təltif olunublar.

Daha sonra ilk üç yerin sahibləri - "Turan", "DH Volley" və "Gəncə" voleybol klublarına müvafiq olaraq qızıl, gümüş və bürünc medallar təqdim edilib. O cümlədən qalib komandaya - "Turan" voleybol klubuna Yüksək Liqanın kuboku təqdim olunub.