Könlümdə taxtü-tac qurmusan Qadın!

Xəbərlər

5.04.2026, 00:37

Könlümdə taxtü-tac qurmusan Qadın! - FOTO

HƏSƏNXAN ƏSƏDOV

Qadın

(qadın adını layiqincə daşıyan qadınlarımıza)

Bəşərin gülüşü, xoş gələcəyi,
Adınla bağlıdır ey əziz Qadın!
Sənin işığınla dünya nurlanır,
Ünvanı, ürəyi tərtəmiz Qadın!

Dünyanı ən gözəl rəngə boyayan,
Tükənməz enerji, sevgidir adın !
Həyatın memarı, Ana dadında,
Ölçüsü, bölgüsü, ülgüsü Qadın!

Bir sirli aləmsən, dağ havasısa,
Çoxuna örnəkdir mehri-səfanız.
Təbiət simvolu, azadlıq qızı.
Çoxdur oxunmayan sehri-vəfanız.

Körpə qığıltısı, körpə qoxusu,
Nəfəsdir, işıqdır hikmətinizə.
Ətrinə bərabər ətir tapılmaz,
Dağlar da baş əyir qüdrətinizə.

Hər kəlmən, hər sözün məhəbbət dadır,
Sevgi cücərdirsən sevgi əkirsən,
Bir əlin beşikdə, mərhəmət dolu,
Dünyanın telinə sığal çəkirsən...

Ömürlər bəzəyi, şeirimə rədif,
Tanrının sevdiyi bəhri-dəstisən.
Gözlərin işıqdır, nəfəsin bahar,
Cənnət qorxulusan, müqəddəsisən!

Zülmət gecələr də tən gəlir sənə,
Sinəndə isinir qış gecələri.
İlahı;- insanlıq donu dəyişib?
Dindirə biləydim kaş gecələri!

Həsənəm, titrəyir sinəmdə ürək,
Qəlbimə əbədi yazılıb adın!
Ən şirin duyğutək ürəyimdəsən,
Könlümdə taxtü-tac qurmusan Qadın!

03.04.2026