“2026-cı il Trans-Xəzər Forumunda Orta Dəhlizin və Xəzər bağlantısının gələcəyi ilə bağlı çıxış etməkdən şərəf duyuram”.

APA xəbər verir ki, bunu “X” hesabında Prezidentin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev yazıb.

O, Orta Dəhlizin artıq sadəcə tranzit yolu olmadığını - Avropanı, Cənubi Qafqazı birləşdirən strateji geoiqtisadi sistemə çevrildiyini və Avrasiya bağlantısının arxitekturasında struktur dəyişikliyi həyata keçirdiyini vurğulayıb.

Hikmət Hacıyev o cümlədən dəmir yolu, dənizçilik, aviasiya və rəqəmsal infrastruktur sahələrinə böyük investisiyaların qoyulması ilə əsas Avrasiya bağlantı mərkəzi kimi Azərbaycanın artan rolunu vurğulayıb.

Prezidentin köməkçisi onu da qeyd edib ki, Azərbaycanın özünəməxsus Cənubi Qafqaz, Mərkəzi Asiya, Avropa, Yaxın Şərq və Xəzər geosiyasi kimlikləri və ölçüləri bir-birini tamamlayır və gücləndirir, ölkəni regionlar arasında təbii körpü kimi yerləşdirir.

“Bugünkü dünyada regional orta gücün gücü təkcə coğrafiya, əhali, iqtisadi ölçü və ya hərbi imkanlarla deyil, həm də tərəfdaşlığının keyfiyyəti, bağlantısı və regional və beynəlxalq gündəliyi formalaşdırmaq qabiliyyəti və qlobal səhnədəki təsiri ilə ölçülür. Azərbaycan bu modeli getdikcə daha çox əks etdirir. Avrasiya boyunca təhlükəsiz, dayanıqlı və gələcəyə yönəlmiş əlaqənin inkişaf etdirilməsinə sadiq olduğumuzu bir daha təsdiqlədik”, - H. Hacıyev bildirib.