Misir-Azərbaycan Dostluq Cəmiyyətində Ramazan ayı münasibətilə iftar süfrəsi təşkil olunub.

Turaztv.az AZƏRTAC-a istinadən xəbər verir ki, cəmiyyətin təşəbbüsü ilə keçirilən tədbirdə Misirdə yaşayan və təhsil alan azərbaycanlılar, onların ailə üzvləri, həmçinin Azərbaycanın bu ölkədəki səfirliyinin əməkdaşları iştirak ediblər. Ramazan ayının mənəvi dəyərlərini bölüşmək məqsədilə təşkil edilən iftar süfrəsi ətrafında qonaqlar bir araya gəliblər.

Tədbirdə çıxış edən Misir-Azərbaycan Dostluq Cəmiyyətinin və Misirdə fəaliyyət göstərən Azərbaycan diasporunun sədri, tədqiqatçı-alim Seymur Nəsirov diaspor fəaliyyətindən və cəmiyyətin gördüyü işlərdən danışıb. O, xüsusilə təhsil sahəsində həyata keçirilən layihələrə toxunaraq, cəmiyyət tərəfindən təşkil edilən kurslar və maarifləndirici proqramlar haqqında məlumat verib.

Azərbaycanın Misirdəki səfiri Elxan Poluxov isə çıxışında iki ölkə arasında mövcud olan dostluq münasibətlərindən bəhs edib. Diplomat qeyd edib ki, Azərbaycan və Misir arasında əlaqələrin inkişafında dövlət başçılarının rolu böyükdür. Yüksək səviyyəli qarşılıqlı səfərlər və bu çərçivədə imzalanan sənədlər əməkdaşlığın daha da genişlənməsinə xidmət edir.