Fransada 2027-ci il prezident seçkilərinə bir ildən çox vaxt qalmasına baxmayaraq, aparılan yeni sorğu seçici meylləri barədə ilkin mənzərə təqdim edir.

Turaztv.az AZƏRTAC-a istinadən xəbər verir ki, “Ifop” və “Fiducial” sorğu mərkəzləri tərəfindən “Sud Radio” radiosu və “Le Figaro” qəzeti üçün keçirilən sorğuya əsasən, ifrat sağçı Milli Birlik (Rassemblement National - RN) partiyası səsvermə niyyətlərində açıq üstünlük əldə edir.

Araşdırmaya görə, partiyanın prezidenti Jordan Bardella birinci turda 36 faiz səs toplamaq potensialına malikdir. Eyni partiyanı təmsil edən Marin Lö Pen namizəd olacağı təqdirdə nəticə 34–35 faiz arasında dəyişir.

Sorğunun nəticələrinə görə, ifrat sağın arxasınca mərkəzçi siyasi qüvvələr gəlir. Keçmiş baş nazir Eduard Filip (“Horizons” partiyası) mərkəz blokunun vahid namizədi olacağı halda 16 faiz səs toplaya bilər.

Eyni vəziyyətdə prezident düşərgəsini təmsil edən Qabriel Attal (“Renaissance” partiyası) 10–11 faiz səviyyəsində dəstək əldə edə bilər.

Mərkəz düşərgəsini təmsil etmək üçün sorğuda adı çəkilən digər siyasətçilər – Jerald Darmanen və Sebastyen Lökornü isə 10 faizdən az səs toplayır.

Sağ cinahın namizədi kimi təqdim edilən Brüno Rötayo (“Les Républicains” partiyası) müxtəlif ssenarilərdə 10–12 faiz səs qazana bilər. Əgər mərkəz və sağ blok vahid namizədlə seçkilərə qatılarsa, onun nəticəsi 17 faizə qədər yüksələ bilər. Bu halda Eduard Filip 23 faiz səs toplaya bilər.

Sorğuda sol düşərgə bir neçə namizədin iştirakı ilə qiymətləndirilib. Jan-Lük Melanşon (“La France Insoumise” partiyası) 10–11 faiz, Rafael Qlüksmen isə 10–12 faiz səs əldə edə bilər.

Ekoloqların lideri Marin Tondelye 5 faizdən aşağı, kommunist namizəd Fabyen Russel isə 3 faizdən az səs toplayır.

Sorğu həmçinin göstərir ki, sosialistləri təmsil etmək üçün Fransua Olland namizəd olsa belə, onun 8 faizdən aşağı səs toplayacaq. Olivye Fore namizəd olacağı halda isə sosialistlərin dəstəyi 5 faiz səviyyəsinə düşür.