Budəfəki Avropa Kuboku yeni və fərqli yarış formatı ilə gimnastika ictimaiyyətinin diqqətini cəlb edir.

Turaztv.az AZƏRTAC-a istinadən xəbər verir ki, bu sözləri Azərbaycan Gimnastika Federasiyasının baş katibi Nurlana Məmmədzadə Bakıda bədii gimnastika üzrə Avropa Kubokunun açılış mərasimi zamanı jurnalistlərə açıqlamasında deyib.

O bildirib ki, bu turnirdə ilk dəfə olaraq idmançılar ənənəvi sistemdən fərqli formatda çıxış edirlər: “Qaydalara əsasən, fərdi gimnastlar təsnifat mərhələsində ilk 16 yerə düşdükdən sonra növbəti mərhələdə 8-liyə vəsiqə uğrunda mübarizə aparırlar. Daha sonra isə final mərhələsinə gedən yolda əlavə raundlar keçirilir və qaliblər müəyyənləşdirilir. Qrup hərəkətləri üzrə komandalar da fərqli sistemlə yarışır. Belə ki, təsnifat mərhələsindən sonra ən yaxşı nəticə göstərən 6 komanda yarımfinal və final mərhələlərində mübarizəni davam etdirir. Yeni format həm gimnastlar, həm məşqçilər, həm də tamaşaçılar arasında böyük maraq doğurur. İndiyədək bu cür sistem tətbiq edilmədiyindən yarışlara əlavə dinamika və həyəcan qatır”.

Federasiya rəsmisi turnirdə mübarizə aparan Azərbaycan idmançılarından da bəhs edib: “Bizim gimnastlarımız həm gənclər yaş kateqoriyasında, həm də böyüklər arasında çıxış edəcəklər. Yarışlar həm qrup hərəkətləri komandaları, həm də fərdi gimnastlar arasında keçiriləcək. Eyni zamanda, gənclər arasında da fərdi proqram üzrə çıxışlar olacaq. Bildiyiniz kimi, “Paris 2024” Olimpiya Oyunlarından sonra milli komandamızda nəsil dəyişikliyi baş verdi. Qrup hərəkətləri komandamız tamamilə yenidən formalaşdırılıb və onlar öz elementlərini və proqramlarını bizə təqdim edəcəklər”.

Qeyd edək ki, bu gün start götürən yarışda 31 ölkədən, ümumilikdə 194 idmançı medallar uğrunda mübarizə aparır. Onlardan 137-si böyüklər, 57-si isə gənclər kateqoriyasında çıxış edir. Turnirdə Azərbaycanı 10 idmançı təmsil edir. Azadə Atakişiyeva və Ayla İsgəndərli gənclər, İlona Zeynalova, Şəms Müvəffəqi, Sofiya Məmmədova, Zəhra Cəfərova, İlahə Bahadırova, Alina Məmmədova, Fidan Qurbanlı və Kamilla Seyidzadə isə böyüklər kateqoriyasında qüvvələrini sınayırlar. Avropa Kuboku mayın 3-dək davam edəcək.