Son vaxtlar sosial şəbəkələrdə əxlaq normalarının qorunması mövzusu ətrafında müzakirələr daha da artıb.

Xüsusilə açıq-saçıq görüntülərin paylaşılması, bədənin nümayişi üzərindən aparılan reklam kampaniyaları və müxtəlif platformalarda yayımlanan bəzi məzmunlar cəmiyyətin müəyyən hissəsində narahatlıq yaradır. Bədənini açıq şəkildə göstərən paylaşımlar, eləcə də geyim və kosmetika məhsullarının bu formada təqdim olunduğu reklamlar əvvəlki kimi davam edir.

Qanunvericilikdə ictimai əxlaqın qorunması ilə bağlı müəyyən müddəalar və inzibati məsuliyyət tədbirləri mövcuddur. Lakin bu qaydaların praktikada nə dərəcədə tətbiq olunduğunu öyrənmək məqsədilə məsələ ilə bağlı Daxili İşlər Nazirliyinə müraciət ünvanladıq.

Məsələ ilə bağlı DİN-dən bildirildi ki, sosial şəbəkələrdə ictimai əxlaq normalarına zidd, cəmiyyətə mənfi təsir göstərən və qanunla yayılması qadağan olunan informasiyaların paylaşılması halları nəzarətdə saxlanılır: "Bu istiqamətdə polis əməkdaşları tərəfindən mütəmadi işlər aparılır, hüquqazidd məzmun yayan şəxslər müəyyən edilərək məsuliyyətə cəlb olunurlar.

Belə hallara yol verən şəxslər barəsində Azərbaycan Respublikasının İnzibati Xətalar Məcəlləsinin internet informasiya ehtiyatında və ya informasiya-telekommunikasiya şəbəkəsində yayılması qadağan edilən informasiyanın yerləşdirilməsi ilə bağlı maddəsi üzrə inzibati protokollar tərtib olunur və qanunvericiliyə uyğun tədbirlər görülür.

Məlumatda bir daha vurğulanır ki, sosial şəbəkə anonimlik mühiti deyil, paylaşılan hər foto, video və ya yazı hüquqi qiymətləndirilə bilər. Qanunu pozan məzmun təkcə silinmir, məsuliyyət yaradır.

İstifadəçilərə tövsiyə olunur ki, paylaşdıqları materialların məzmununa ciddi və məsuliyyətlə yanaşsınlar, qanunvericiliyin tələblərini və ictimai əxlaq normalarını pozan informasiyaların yayımından çəkin­sinlər.