Lütf eylə, olum altıbucaq cənnətə zair : Müəllif: Həsən Lütfi

Xəbərlər

25.01.2026, 21:40

Lütf eylə, olum altıbucaq cənnətə zair : Müəllif: Həsən Lütfi

Gəldim qapına dildə diləklərlə, Hüseynim,
Möhtacına ehsan et ətəklərlə, Hüseynim.

İnsanlığın, azadəliyin ülgüsü sənsən,
Nöqsansız İlahın ləkəsiz güzgüsü sənsən,
Ən sarp uçurumlarda nicat körpüsü sənsən,
Nazəndə çiçəklərdəki naz mürgüsü sənsən,
Sənsən görünən cümlə gözəllikdə, Hüseynim,
Yox bənzərin olsun sən özəllikdə, Hüseynim.

Var qarşıqoyulmaz elə bir cazibə səndə,
Hüsnün düşürər, doğrusu, hər bəndəni bəndə,
Aləmləri sən salmısan eşqinlə kəməndə,
Qur'an kimi pakizə adın zikr ediləndə
Artar qara simalıların qəhri, Hüseynim,
Parlar sənə sevdalıların mehri, Hüseynim.

Canlar canısan, can gözəl əshabına qurban,
Kimdən söz açım? Hər biri bir şanlıca dastan,
Dünya tora salmışdı əzəl Hürrü, Hüseyncan,
Qarşında ədəb gözlədi ancaq o nər aslan,
Axır düşünüb mə'nəvi zəncirləri qırdı,
Verdi adının haqqını, hürriyyətə vardı.

Görkəmcə qocalmışdı Həbib, eşqi cavandı,
Bir dağdı ki, ağ saqqalı bir çəngə dumandı,
Bir gün o duman şanlı şəfəqlərlə boyandı,
Son dəmdə küləklər sənə çatdırdı bu andı:
"Sənsən mənə öndər bu yolun hər qarışında,
Getsən başım ardınca gələr nizə başında."

Bilməm nə işıqlar yayılır aydın üzündən?
Kim göz götürər cazibə girdabı gözündən?
Meyl etməz ikən heç sənə, getməzkən izindən
Xeyməndə Züheyr oldu qonaq, keçdi özündən,
Sərməst idi hüsnündən, odur, eşq günündə
Köksün sipər etmişdi Züheyr oxlar önündə.

Bar dərmədi dünyada Vəhəb sevgi bağından,
Baş bildi yanar qumları rahət yatağından,
Çöl qaplanı qorxarmı rəşadət sınağından?
Çıxmışdı o bir mərd ananın pak ocağından,
Bir vaxtı məsihiydi, keçib can həvəsindən
Ölməz dirilik tapdı Hüseynin nəfəsindən.

Hisslər belə daşmışdı sözə Covn ürəyindən:
"Ağ gündə, Ağa, çox yemişəm duz-çörəyindən,
Dar gündə qulun əl çəkə heyhat ətəyindən,
Qoy gülşənə dönsün bədənim qan çiçəyindən,"
Cəng etdi, yıxıldı üzüağ bəndə üz üstə,
Ya Rəb, yara almış başı yar aldı diz üstə.

Bir laləli çöldür şühəda Kərbübəlası,
Billahi, verilməz iki dünyayə səfası,
Üçgünlük ömürçün o fəza feyz fəzası,
Dörd fəsldə yazdır oranın türfə havası,
Ay Lütfinin üz tutduğu, beş nuruna xatir,
Lütf eylə, olum altıbucaq cənnətə zair.