Azərbaycan jurnalistikası dəyərli qələm sahibini, nurlu bir insanı – Şahin Ənvər oğlu Babayevi itirdi. Bu itki onu tanıyan, onunla ünsiyyətdə olan hər kəs üçün ağır oldu. Şahin müəllim səs-küyü sevməyən, özünü önə çıxarmayan, lakin davranışı və əməlləri ilə seçilən nadir insanlardan idi.
Onun ən böyük keyfiyyətləri dürüstlüyü, sadəliyi, diqqətcilliyi və ədəb-ərkanı idi. Şahin müəllim hər zaman ölçülü-biçili danışar, heç kimin xətrinə dəyməz, hər kəsə hörmətlə yanaşardı. Vəzifəsindən asılı olmayaraq, özünü başqalarından üstün tutmazdı. Elə bu sadəliyi də onu hamıya sevdirən əsas cəhət idi.

Azərbaycan Jurnalistlər Birliyində uzun illər səmərəli fəaliyyət göstərən Şahin Babayev peşəsinə vicdanla yanaşan jurnalist idi. O, sözün məsuliyyətini dərindən anlayır, həqiqəti qorumağı özünə borc bilirdi. Gənc jurnalistlərə diqqət göstərər, yol göstərər, təcrübəsini səxavətlə bölüşərdi. Onun diqqətcil münasibəti, səmimi tövsiyələri bu gün də unudulmur.
Şahin müəllim Azərbaycan Jurnalistlər Birliyinə uzun illər rəhbərlik etmiş, jurnalistika tariximizdə xüsusi yeri olan mərhum jurnalist Hacı Hacıyevin yaxın qohumu idi. Bu, təsadüfi deyildi – ziyalılıq, mədəniyyət və peşə etikası onun ailəsindən gələn bir dəyər idi.
Şahin müəllimin vəfat etdiyi gün bir çoxları bu xəbərə inanmadı. Belə sakit, belə sadə, belə xeyirxah bir insanın bu dünyadan köçməsi hamı üçün gözlənilməz oldu. Etiraf etmək lazımdır ki, onun kimi təvazökar bir insanın hüzn məclisində az sayda adamın iştirakı insana təsir edir, məyusluq yaradır. Amma bəzən insanın böyüklüyü izdihamla deyil, ürəklərdə qoyduğu izlə ölçülür. Şahin müəllim də məhz belə insanlardan idi.
Hər dəfə Şahin müəllimdən yazmaq istəyəndə deyərdi ki, tələsmə , sağlıq olsun.Dost haqqında nekroloq yazmaq mənim üçün çox ağırdır. Ruhun şad olsun gözəl insan.
O, səssiz yaşadı, səssiz getdi, amma arxasında dərin hörmət, təmiz ad və xoş xatirələr qoydu. Bu, hər kəsə nəsib olmayan bir ömür payıdır.
Allah Şahin Ənvər oğlu Babayevə rəhmət eləsin, məkanı cənnət olsun. Ailəsinə, yaxınlarına və onu sevən hər kəsə səbr diləyirik.
Şahin müəllimin 40 mərasimi dekabrın 20-də Heydər məscidində keçiriləcək.

Rauf İLYASOGLU,
"Həkəri" qəzetinin baş redaktoru,
şair- publisist