Abşeron rayonunda 8 Noyabr - Zəfər Günü ilə bağlı şəhid ailələri ilə görüş keçirilib.

"Turaztv.az" “Qafqazinfo”-ya istinadən xəbər verir ki, Abşeron Rayon İcra Hakimiyyətinin və YAP Abşeron Rayon Təşkilatının birgə təşkilatçılığı ilə keçirilən tədbirdə RİH başçısı Abdin Fərzəliyev, Milli Məclisin deputatları Nigar Məmmədova, Rizvan Nəbiyev, YAP Abşeron Rayon Təşkilatının sədri Abbas Əliyev, Abşeron-Xızı Regional Təhsil İdarəsinin müdiri İlhamə Abdullayeva, Abşeron RİH yanında İctimai Şuranın sədri, Vətən Müharibəsi şəhidi Elçin Həsənlinin anası Xatirə İsmayılova, rayonun hüquq-mühafizə orqanlarının rəhbərləri, şəhid ailələri, müharibə iştirakçıları və rayon ictimaiyyəti iştirak edib.

Tədbirdə Ulu Öndər Heydər Əliyevin və vətənimizin ərazi bütövlüyü uğrunda şəhidlik zirvəsinə ucalan qəhrəmanlarımızın əziz xatirəsi bir dəqiqəlik sükutla yad edilib, Dövlət Himni oxunub.

Zəfərimizin 5-ci ildönümü münasibəti ilə tədbir iştirakçılarını təbrik edən RİH başçısı Abdin Fərzəliyev bildirib ki, Müzəffər Ali Baş Komandan, Azərbaycan Prezidenti İlham Əliyevin qətiyyətli iradəsi, uzaqgörən siyasəti sayəsində Vətən Müharibəsində xalqımız qalib gəldi. Şəhidlərimizin və ümumilikdə ordumuzun şücəti ilə düşmən döyüş meydanında diz çökdürüldü və bununla da 30 illik vətən həsrətinə son qoyuldu. İşğaldan azad olunan ərazilərdə həyata keçirilən bərpa-quruculuq işlərindən, soydaşlarımızın öz dədə-baba yurdlarına qayıtmasından, azad, təhlükəsiz şəraitdə yaşamağa başlamasından danışan RİH başçısı ölkəmizdə şəhid ailələrinə, müharibə iştirakçılarına böyük diqqət və qayğının göstərildiyini və bu qayğının bundan sonra da davam etdiriləcəyini söyləyib.

YAP Abşeron Rayon Təşkilatının sədri Abbas Əliyev də çıxış edərək bildirib ki, respublikanın hər yerində olduğu kimi, Abşeron rayonunda da xalqımızın qəhrəmanlıq salnaməsinə çevrilən 8 Noyabr - Zəfər Gününə həsr olunan silsilə tədbirlər keçirilir. Bu bayramın xalqımız üçün xüsusi yerə, xüsusi əhəmiyyətə malik olduğunu qeyd edən təşkilat sədri əlavə edib ki, Zəfər bayramı Azərbaycan igidlərinin döyüş meydanında sərgilədiyi qəhrəmanlıqların təcəssümüdür.

Milli Məclisin deputatı Nigar Məmmədova Zəfər bayramının əhəmiyyətindən danışaraq qeyd edib ki, bu qələbə ilə Azərbaycan xalqı bölgəyə sülh və əmin amanlıq gətirdi. Regionumuzun siyasi baxışı dəyişdi. Artıq bölgəmizdə yeni böyük imkanlar və logistik fürsətlər yaranıb.

Milli Məclisin deputatı Rizvan Nəbiyev də çıxış edərək bildirib ki, Azərbaycan Vətən Müharibəsində qalib gəlməklə regionun siyasətini sülhə, bərabərliyə doğru dəyişib. Xalqımız “Dəmir yumruq” ətrafında sıx birləşərək vətənimizin ərazi bütövlüyünü, suverenliyimizi tam bərpa etdi.

Abşeron RİH yanında İctimai Şuranın sədri, Vətən Müharibəsi şəhidi Elçin Həsənlinin anası Xatirə İsmayılova çıxış edərək, ölkəmizdə şəhid ailələrinə göstərilən diqqət və qayğıdan danışıb.

Tədbirdə Vətən Müharibəsi qəhrəmanı, şəhid Orxan Əkbərovun övladı Çingiz Əkbərovun və Vətən Müharibəsi şəhidi Fərid Məmmədovun övladı Fuad Məmmədovun doğum günləri təbrik edildi, onlara müxtəlif hədiyyələr təqdim olundu.

Bundan sonra tədbirin bədii hissəsi başlayıb. Bədii hissədə ölkəmizin tanınmış incəsənət nümayəndələrinin iştirakı ilə vətənə, qələbəmizə həsr olunan mahnılar səsləndirilib.