Bakı Dövlət Universitetində “BDU könüllüləri” təşkilatının təşəbbüsü ilə şair, tərcüməçi, Xalq şairi Vahid Əzizin tələbələrlə görüşü keçirilib. Görüşdə Azərbaycan Könüllü Təşkilatları İttifaqına üzv olan qurumların könüllüləri də iştirak ediblər.

Turaztv.az AZƏRTAC-a istinadən xəbər verir ki, BDU-nun sosial məsələlər, tələbələrlə iş və ictimaiyyətlə əlaqələr üzrə prorektoru Əliş Ağamirzəyev Qarabağda tarixi Zəfərin beşinci ildönümünün qeyd edildiyi günlərin hər kəsdə qürur hissi yaratdığını bildirib. O qeyd edib ki, Azərbaycan xalqı həm qəhrəman, həm də yaradıcı xalqdır: “Azərbaycan hər zaman öz şairləri, ədibləri ilə fəxr edib, çünki onlar hər zaman əsərlərində bəşəri dəyərləri, ülvi hissləri və Vətənə məhəbbəti təbliğ ediblər. Müasir Azərbaycan ədəbiyyatının böyük simalarından olan Xalq şairi Vahid Əzizlə görüş də gənc nəslin bu ideyalara sadiq böyüməsi üçün təşkil edilib. Maraqlı məqamlardan biri də odur ki, bugünkü tədbirimizdə yalnız BDU tələbələri deyil, digər ali təhsil müəssisələrinin də tələbələri iştirak edirlər. İnanıram ki, bu görüş gənclərimiz üçün faydalı və maraqlı olacaq”.

Tədbirin moderatoru, BDU-nun İnformasiya və sənəd menecmenti fakültəsinin dekanı Ələmdar Cabbarlı Xalq şairi Vahid Əzizin həyat və yaradıcılıq yolundan söz açıb. Qeyd edib ki, görkəmli şair 1945-ci il noyabrın 23-də Qərbi Azərbaycanın Dərələyəz mahalının Paşalar kəndində anadan olub, orta məktəbi Tərtər rayonunda bitirib. Azərbaycan Politexnik İnstitutunu bitirdikdən sonra bir sıra vəzifələrdə çalışıb. Ötən əsrin 60-cı illərindən ədəbi fəaliyyətə başlayan Vahid Əzizin yaradıcılığında sevgi motivi daim öndə olub. Onun şeirlərinə bəstələnmiş mahnılar milli musiqi xəzinəmizin ən gözəl nümunələrindəndir. Şairin yaradıcılığına ən yüksək dəyər isə Azərbaycan Respublikasının Prezidenti İlham Əliyevin Sərəncamı ilə Xalq şairi fəxri adının verilməsi olub.

Sonra söz Vahid Əzizə verilib. Görkəmli şair Zəfərimizin beşinci ilində keçirilən görüşdə müəllifi olduğu “Mübarəkdir!” şeirini səsləndirib, qələbəmizin Azərbaycan tarixinin qızıl səhifəsinə çevrildiyini deyib.

Daha sonra tanınmış şair yaradıcılığının ən sevilən şeirlərini səsləndirib, tələbələrin çoxsaylı suallarını cavablandırıb. Görüşdə BDU-nun Mədəniyyət-Yaradıcılıq Mərkəzinin əməkdaşlarının ifasında Vahid Əzizin şeirlərinə bəstələnən musiqilər ifa olunub.

Sonda BDU rektoru Elçin Babayev görüşdə iştirakına görə Vahid Əzizə təşəkkür edib.