“Carlsberg Azerbaijan” növbəti dəfə “Xəzəri Qoruyaq!” adlı genişmiqyaslı ekoloji aksiyaya dəstək olub. Sentyabrın 1-dən 20-nə qədər davam edən aksiya Xəzərin Lənkəran, Astara, Neftçala, Xaçmaz, Siyəzən, Sumqayıt və Bakı çimərliklərini əhatə edib.

Beynəlxalq Sahilyanı Təmizlik Günü çərçivəsində keçirilən aksiyanın məqsədi Azərbaycanda ekoloji vəziyyəti yaxşılaşdırmaq, əhalini təkrar emal istiqamətində maarifləndirmək və ətraf mühitə məsuliyyətli yanaşmanı təbliğ etməkdir.

“Xəzəri Qoruyaq!”çərçivəsində yekun təmizlik aksiyası Bakının Bilgəh çimərliyində baş tutub. Bu il ümumilikdə 1300-dən çox könüllünün iştirakı ilə çimərlik ərazilərindən 5 tondan çox tullantı toplanılıb.

“Carlsberg Azerbaijan” komandası da aksiyada aktiv iştirak edərək Xəzər çimərliklərinin tullantılardan təmizlənməsinə öz töhfəsini verib. Şirkət, həmçinin aksiya boyunca könüllüləri ölkədə ilk yerli istehsal olunan 0.0 alkoqollu içki “Xırdalan 0.0” ilə də təmin edib.

“Carlsberg Azerbaijan”ın baş direktoru Alius Antulis bildirib ki, şirkət özünün qlobal “Birlikdə SIFIRA doğru və daha İrəli” dayanıqlı inkişaf strategiyasına uyğun olaraq fəaliyyət göstərdiyi ölkələrdə ekoloji layihələrə dəstək olur: “Altı ildən artıqdır ki, “Carlsberg Azerbaijan” “Xəzəri Qoruyaq!” kampaniyasının mühüm tərəfdaşlarından biridir. Biz bu illər ərzində ekoloji dəyərlərin qorunması və tullantısız gələcəyin qurulması istiqamətində ardıcıl addımlar atmışıq. Bu gün əməkdaşlarımız və tərəfdaşlarımızla birgə sahildə keçirdiyimiz aksiyada toplanan tullantıların həcmi göstərir ki, birgə səylərimiz real nəticə verir. Gələcəkdə daha çox şirkət və təşkilatın bu təşəbbüsə qoşulacağına inanıram və hər kəsi daha təmiz Xəzər naminə həmrəyliyə çağırıram”.

“Carlsberg Azerbaijan” ilə yanaşı aksiyanın əsas tərəfdaşları Ekologiya və Təbii Sərvətlər Nazirliyi, “Coca-Cola”, Azərbaycan Dövlət Neft Şirkətinin (SOCAR), “EcoHub” ekoloji platforması, “AmCham”, “PwC Azərbaycan” və “McDonald's” şirkətləri olublar.

Xatırladaq ki, 1986-cı ildə təsis edilən Beynəlxalq Sahilyanı Təmizlik Günü dünyanın 100-dən çox ölkəsində qeyd olunur. Azərbaycan “Xəzəri Qoruyaq!” şüarı ilə artıq 16 ildir ki, bu təşəbbüsdə iştirak edir.

Qeyd edək ki, “Birlikdə SIFIRA doğru və daha İrəli” adlı qlobal dayanıqlı inkişaf proqramı “Carlsberg Group”un 2040-cı ilə qədər bütün dəyər zənciri üzrə bir sıra istiqamətlərdə ətraf mühitə təsiri azaltmaq üçün hazırladığı strategiyadır.

Şirkət həmin strategiyaya uyğun olaraq SIFIR karbon izi, SIFIR kənd təsərrüfatı tullantısı, SIFIR su itkisi, SIFIR məsuliyyətsiz istehlak, SIFIR qablaşdırma tullantısı və SIFIR bədbəxt hadisə ambisiyaları ilə davamlılıq proqramını icra edir.

#XəzəriQoruyaq #CoastalCleanup