Üzeyir Hacıbəylinin 140 illik yubileyinə həsr olunmuş bu konsertin dinləyicisi olmaq mənim üçün böyük bir məmnuniyyətdir. Bu tədbir sayəsində mən Azərbaycan musiqisinin nəhəng simalarından biri – Üzeyir Hacıbəyli ilə daha yaxından tanış olmaq fürsəti qazanıram. O, Şərq dünyasında opera sənətinin banilərindən biri kimi xüsusi yer tutur və belə bir bəstəkarın yaradıcılığı ilə tanış olmaq mənim üçün həm böyük şərəfdir, həm də sonsuz maraq doğurur.

Bu fikri UNESCO-da Üzeyir Hacıbəylinin 140 illiyinə həsr edilmiş konsertin dinləyicisi fransız vəkil Alən Tremolyer AZƏRTAC-a müsahibəsində deyib.

“Bu axşam səhnədə çıxış edəcək üç musiqiçini şəxsən tanıyıram və onların ifalarını səbirsizliklə gözləyirəm. Konsert proqramı həm emosional, həm də intellektual baxımdan zəngin təəssüratlar yaradıb”, - deyə A.Tremolyer Şuşa səfərindən də söz açıb.

“Üzeyir Hacıbəyli Qarabağın incisi olan Şuşa şəhərində dünyaya gəlib. Mən özüm də Şuşada olmuşam və orada keçirdiyim gözəl anlar yaddaşıma dərin iz salıb. Bəlkə də birbaşa müqayisə etmək tam uyğun deyil, amma mən Şuşanı Fransanın Avinyon şəhəri ilə müəyyən mənada oxşar görürəm. Hər iki şəhər mədəniyyətin canlı mərkəzləridir – poeziya, musiqi, rəqs və yaradıcılıqla dolu məkanlardır. Onlar tarixlə, ruhla və incəsənətlə nəfəs alırlar.

Üzeyir Hacıbəylinin irsi təkcə Azərbaycan musiqisinin deyil, bütün Şərq mədəniyyətinin inkişafında mühüm rol oynayıb. Bu gün onun yaradıcılığı dünya musiqi xəzinəsinin parlaq nümunələrindən biri kimi dəyərləndirilir. Belə bir dahi sənətkarın yubileyinə həsr olunmuş konsertdə iştirak etmək mənim üçün unudulmaz təcrübədir”, - deyə fransız vəkil vurğulayıb.