“Forbes” jurnalı 2025-ci il üçün ABŞ-nin ən zəngin adamlarının siyahısını dərc edib.

"Turaztv.az" “Qafqazinfo”-ya istinadən xəbər verir ki, 400 ən varlı amerikalının sərvəti son 12 ayda 1,2 trilyon dollar artaraq rekord həddə çatıb - 6,6 trilyon dollar.

“Tesla” və “SpaceX”in qurucusu İlon Mask dördüncü ildir ki, dünyanın və ABŞ-nin ən zəngin adamı olaraq qalır. O, sərvəti 400 milyard dolları keçən ilk şəxs olub. Ötən illə müqayisədə Maskın sərvəti 184 milyard dollar artıb, xüsusən də “Tesla” səhmlərindəki 56% artım sayəsində.

Reytinqdə ikinci yeri “Oracle” texnoloji şirkətinin həmtəsisçisi və direktorlar şurasının sədri Larri Ellison tutur. Onun sərvəti reytinq zamanı 276 milyard dollar dəyərində qiymətləndirilib. “Oracle” səhmlərinin dəyərinin 60% artması sayəsində o, bu il 101 milyard dollar zənginləşib.

Mark Zukerberq ən zəngin amerikalıların reytinqində üçüncüdür. Reytinq zamanı onun sərvəti “Meta” səhmləri 42% artdıqdan sonra 253 milyard dollar qiymətləndirilib.

Reytinqdə dördüncü yeri “Amazon”un yaradıcısı Ceff Bezos (241 milyard dollar), “Google”un həmtəsisçisi Larri Peyc isə beşinci yeri (179 milyard dollar) tutub.

ABŞ-nin ən zəngin qadını 106 milyard dollar sərvəti ilə Walmartın varisi Alise Valtondur.