Böyük Britaniyanın Baş naziri Kir Starmerin rəhbərlik etdiyi Leyboristlər Partiyası partiya intizamını dəfələrlə pozduqlarına görə dörd deputatın partiya üzvlüyünü dayandırıb.

AZƏRTAC BBC-yə istinadla xəbər verir ki, Neil Dunkan Cordan, Brayan Leyşman, Kris Hinçliff və Reyçel Maskell artıq partiyanın tərkibində olmayacaqlar və Parlamentin İcmalar Palatasında müstəqil deputat kimi çıxış edəcəklər. Bundan əlavə, daha üç deputat isə ticarət elçisi vəzifələrindən uzaqlaşdırılıblar.

Qərar bu ayın əvvəlində hökumətin sosial təminat islahatları qanun layihəsinə qarşı səs verən bu deputatlara cavab olaraq verilib. Ümumilikdə Leyboristlər Partiyasının 47 deputatı hökumətin sosial təminat xərclərində ixtisar planlarına qarşı çıxaraq bu layihənin zəiflədilməsinə səbəb olub. Bu isə Kir Starmerin mövqeyini sarsıdıb. O, son vaxtlar bir sıra siyasi qərarlarını dəyişmək məcburiyyətində qalıb. Məsələn, milyonlarla pensiyaçının qış yanacaq müavinəti yenidən bərpa edilib. Reyçel Maskell bu qanun layihəsinə qarşı kampaniyanın əsas təşkilatçılarından biri olub.