Arzu Yaqub qızı : Ömrünün küncünə çəkilən qadın

Xəbərlər

3.07.2025, 20:32

Arzu Yaqub qızı : Ömrünün küncünə çəkilən qadın - FOTO

Əvvəldən taleyi heç gətirməyən,
Sonra parçalanan , bölünən qadın.
İsmətin başının tacı eləyib,
Dərdlilər içində görünən qadın.

Səssizdir, məsumdur təbəssümün də,
Gülsən gülüşün də batacaq qəmə.
Dünyanın yükü var çiyinlərində,
Necə yaraşardı səadət sənə.

Sağalmaz yaranın məlhəmi varmı,
Ağırdır itirmək ümidlərini.
Ürək duyan dərdi kim duyacaq, kim,
Bəlkə səadətin unudub səni.

Saçının telində səbr adlı yollar...
Arzuların küsüb, bir də qayıtmaz.
Yüz təsəlli belə, min sığal belə,
Yaralı könlünü heç vaxt ovutmaz.

Bir vaxt möhkəm-möhkəm tutduğun əllər,
İndu qucaqlayır xəyallarını.
Dumana, çiskinə bürünən qadın,
Xəzan yeli vurub ilk baharını.

Bəlkə gəncliyində qayğısız idin,
Nədir taleyinə yazılan qadın?
İndi ümidinin yoxdur harayı,
Taleyi gözündən süzülən qadın.

O məsum rəsmini çəkib yaradan
Hanı gözlərinin nuru, işığı.
Anadan talesiz doğulmamışdın,
Olardın bir evin sən yaraşığı.

Bağı- bağçasında gül çiçək açan,
Gözü gül ömrünə dikilən qadın.
İlğımda səadət axtarıb bezən,
Ömrünün küncünə çəkilən qadın,
Ömrünün küncünə çəkilən qadın...