Baş rollarında Çağatay Ulusoy və Demet Özdemirin yer aldığı “Eşref Rüya” serialı yeni mövsümə səs-küylü transferlə başlaya bilər.

"Turaztv.az" “Qafqazinfo”-ya istinadən xəbər verir ki, tanınmış aktyor Aras Bulut İynemlinin seriala qoşulacağı bildirilir. İddialara əsasən, o, “Eşref Rüya”ya yetimlərin xaricdəki lideri obrazı ilə daxil olacaq.

Arasın hazırda baş rolunu canlandırdığı “Deha” serialının final etməsi onun sözügedən seriala keçidi ilə bağlı söz-söhbətləri daha da gücləndirib.

Tamaşaçılar Aras və Çağatayı uzun illərdən sonra eyni layihədə birlikdə görmək istəyir. Bu iki ulduz sonuncu dəfə 2016-cı ildə yayımlanan və böyük uğur qazanan “İçerde” serialında bir araya gəlmişdilər.

Bu məlumat hələlik rəsmi təsdiqini tapmasa da, sosial şəbəkələrdə sürətlə yayılan iddialar seriala marağı artırıb.

Qeyd edək ki, “Eşref Rüya” Türkiyə ilə yanaşı, Azərbaycanda da maraqla izlənilir. Lakin serial reytinqlərdə istənilən nəticəni göstərə bilmədiyi üçün yeni mövsümdə heyətdə dəyişikliklər olacağı gözlənilir.