BFMTV kanalının sifarişi ilə Elabe sorğu institutu Avropa İttifaqının vəsaitlərini mənimsəməkdə təqsirli bilinən Marin Le Penə qarşı çıxarılan məhkəmə qərarı ilə bağlı sosial sorğu keçirib.

Turaztv.az AZƏRTAC-a istinadən xəbər verir ki, sorğunun nəticələrinə görə, fransızların yarıdan çoxu (68%) Le Penə qarşı ittihamları nəzərə alaraq məhkəmə qərarını normal hesab edir. Həmçinin həmin respondentlər hesab edir ki, dövlət vəsaitlərini mənimsəməkdə təqsirli bilinən şəxslərə məhkəmənin tətbiq etdiyi müvəqqəti icra qaydası ədalətlidir. Paris İslah Məhkəməsi Marin Le Penin 5 il müddətinə seçkilərə buraxılmamaq kimi müvəqqəti icra qaydasını aktivləşdirərək dərhal tətbiq edilməsinə qərar verib.

Xatırladaq ki, 25 nəfər, o cümlədən Milli Birlik (RN) partiyasından 9 deputat və 12 deputat köməkçisi Avropa Parlamentində qondarma işdə təqribən 4,1 milyon avro dəyərində dövlət vəsaitlərinin mənimsənilməsində və gizlətməkdə təqsirli bilinib.

Marin Le Pen vəkili Rodolf Bosselut vasitəsilə məhkəmə hökmündən apellyasiya şikayəti verdiyini açıqlayıb.

Apellyasiya şikayəti avtomatik olaraq cəzanın icrasını dayandırsa da, bu, Paris məhkəməsi tərəfindən çıxarılan müvəqqəti icra tədbirinə tabe olan seçkilərə buraxılmama hökmünə təsir göstərmir.

Apellyasiya məhkəməsi 2027-ci il prezident seçkilərindən əvvəl yekunlaşacaq, ancaq Marin Le Penin seçkilərə buraxılmama qadağası aradan qaldırılmasa, o, bütün sorğularda qalib gələcəyi proqnozlaşdırılsa da, Yelisey Sarayına namizəd kimi iştirak edə bilməyəcək.