YAQUB ABBASOV : DEYİM SƏNƏ - FOTO

Xəbərlər

11.02.2025, 22:25

YAQUB ABBASOV : DEYİM SƏNƏ - FOTO

DEYİM SƏNƏ

Gözəllik yaradan şəfalı həkim,
İstədim yeni bir ad deyim Sənə.
Cəzaya çatacaq həddini aşan,
Atəş deyim Sənə, od deyim Sənə!

Müştəbeh üstünə ayaq almasın,
Bir tədbir görürsən, izi qalmasın.
Vaxtında silirsən "qotur" salmasın,
Spirtmi söyləyim, yod deyim Sənə?

Ünsiyyət açarı- misqal tərəzi.
Sözün hədəfdədir, közərir izi.
Yadıma salıram neçə məclisi,
İpək deyim sənə, cod deyim sənə?

Bu zarafat oldu ağlıma batan,
Bir təbrik söyləyim könlünə yatan!
Doxsanı ötürüb, yüzünə çatan,
İndi dostmu deyim, yad deyim sənə?

YAQUB ABBASOV
05.92.2025.

######################################

DEYİN MƏNƏ

(hörmətli dostum, qardaşım Yaqub bəyin mənə doğum günümdə yazdığı zarafatyana bir şeirə, yazdığım bir nəzirə)

Nə atəş deyiləm, nə od deyiləm,
Nə doğma deyiləm, nə yad deyiləm.
Dostlardan nə gəlsə ona qailəm,
Heç nə istəmirəm, dost deyin mənə!

Müştəbeh üstümə alammaz ayaq,
Yaqub tək dostum var, arxa, həm dayaq.
Yod, spirt desə də zarafat sayaq,
Heç nə istəmirəm, dost deyin mənə!

Cod da oluram mən yeri gələndə,
İpəyə dönürəm üzüm güləndə.
Nəyi seçməliyəm? Bunu biləndə,
Heç nə istəmirəm, dost deyin mənə!

Yadın da təbriki könlümə yatdı,
Dostumun sualı ağlıma batdı.
Bu nə bir iraddı, nə zarafatdı,
Heç nə istəmirəm, dost deyin mənə!