Böyük Britaniya hər il on minlərlə insanı ölkəyə qanunsuz yollarla gətirən dəstə rəhbərlərini, eləcə də onların istifadə etdiyi qayıqların və mühərriklərin istehsalçısı olan, əsasən Çin mənşəli şirkətləri hədəfə almaq üçün yeni sanksiya rejimi yaradacaq.

Turaztv.az AZƏRTAC-a istinadən xəbər verir ki, bu barədə hökumət açıqlama verib. Fransadan kiçik qayıqlarla gələn miqrantların sayını azaltmaq üçün ciddi siyasi təzyiq altında olan hökumət bildirib ki, bu qanunlar digər islahatları tamamlayacaq.

“Biz insan həyatını təhlükəyə atanlardan qazanc əldə edənləri hədəfə alacağıq və dəstələrin maliyyə mənbələrini pozacağıq”, - deyə daxili işlər naziri İvet Kuper bəyan edib.

Hökumət sanksiyaların ilin sonuna qədər qüvvəyə minəcəyini və insan alveri ilə məşğul olan şəxslərin Britaniyaya girişinin qadağan olunmasına, onlarla işgüzar münasibət quranların cəzalandırılmasına və həmin şəxslərin maliyyə aktivlərinin dondurulmasına imkan yaradacağını bəyan edib.