Xəbərlər
1.09.2024, 01:51
Pünhan Şükür: ƏFƏNDİSİNİ TAPMAYAN ÜZÜK – Çox da uzun olmayan hekayə - FOTO
Onun üstündə digər metallardan hazırlanan üzüklər əfəndilərinin işinə yarımaları ilə xoşbəxtliyə qovuşmuşdular: Gümüş də göz qamaşdırır, Mis elektriki yaxşı keçirir, Titan sərtdir, Volfram müqavimətlidir... Hətta paslanan Dəmir belə maqniti cəzb etmək xüsusiyyəti ilə qədirli-qiymətli olmuşdu.
Elə bilirdi, qaşı ilə birgə bərq vurub Günəşə meydan oxuya bilər. Halbuki, özünün də parıldaması üçün üzərinə gün işığı düşməliydi.
Həmişə başı dik gəzirdi. Təkəbbürdən ayağının altına baxmadığı günlərin birində necə oldusa büdrədi, diyirlənib qaranlıq otağın qapıdan uzaq küncünə düşdü. Zülməti yarıb çıxışı tapmağa nə özünün, nə də qaşının parıltısı yetdi. Çox qorxdu. Nəhayət, yaşıl rəngli bir cüt ulduzun yaxınlaşdığını görüb sevindi. Amma bu sevinci uzun sürmədi. Qara Pişiyin əlində oyuncağa çevrildi; gah o divara, gah bu divara çırpıldı.
Zərbə dəyib çatlamış qaşına acığı tutdu: “Pişiyin gözündəki fosfor qədər də olmadın ki, qara günümüz üçün işıq depolayasan!” Brilyant cavab verdi: “Günah sənin özündədir. Başa düşmədin ki, zinət statusu qazanmağımız üçün kiminsə barmağını bəzəməyimiz mütləq lazımdı. İndi pişik quyruğuna keçmişik”.
Son xəbərlər
Ən çox oxunanlar
- Bu gün
- Bu həftə
- Bu ay
