Fransa Prezidenti Emmanuel Makron keçən ay növbədənkənar seçkilər təyin etməklə ölkəsi ilə yanaşı, Avropanın da gələcəyini riskə atıb.

AZƏRTAC-ın verdiyi xəbərə görə, bu barədə “Reuters” agentliyi məlumat yayıb.

“Reuters” yazır ki, bazar günü keçirilən səsvermənin ikinci turunun nəticələrindən çox şey asılı olsa da, aydındır ki, Makronun Avropaya inteqrasiyanın aparıcı qüvvəsi kimi rolu əhəmiyyətli dərəcədə azalacaq.

Avropa İttifaqının əsas ənənəvi siyasi istiqaməti üçün ən böyük qorxu “Milli Birliyin” açıq qələbəsidir. Bu, Makronu onun Avropa suverenliyinə dair baxışlarına düşmən olan bir hökumətlə “yanaşı yaşamağa” məcbur edəcək.

Hətta ayrı-ayrılıqda çətin bir koalisiyaya və ya partiyaların əməkdaşlığına gətirib çıxaran mütləq çoxluğu olmayan parlament, Makronu onun siyasətinə sadiq olan hökumətdən məhrum edəcək.

Fransa və Almaniyanın ənənəvi olaraq 27 dövlətdən ibarət Avropa İttifaqının aparıcı qüvvəsi olduğu üçün, blok ikiqat siyasi ifliclə üzləşə bilər, çünki onun iki ən mühüm avropapərəst lideri məğlub olacaq.

Keçən ay Avropa Parlamenti seçkilərində partiyasının məğlubiyyəti ilə üzləşən Almaniya Kansleri Olaf Şolts koalisiyasının birliyini qorumaqda çətinlik çəkir və qarşıdan gələn regional seçkilərdə ifrat sağçıların güclü nəticələr əldə etməsinə hazırlaşır.

Avropa Siyasi Mərkəzinin analitik mərkəzinin direktor müavini Elizabet Keyperin sözlərinə görə, Makron ölkə daxilində ciddi şəkildə zəifləyib, bu da onun Brüsseldəki mövqeyinə, eləcə də Fransa - Almaniya münasibətlərinə təsir edəcək.

“Reuters” Le Pen RN-nin rəhbərlik etdiyi hökumətin Aİ-nin icra hakimiyyətində əsas rolu olan Fransanın növbəti Avropa komissarını təyin edəcəyini bildirib. Lakin ənənəvi olaraq bu, prezidentin müstəsna hüququdur və Makron indiki Tyerri Bretonu saxlamaq istədiyini artıq açıq şəkildə bildirib.

RN həmçinin istəyir ki, Fransa Aİ büdcəsindən güzəşt alsın, Aİ də bunu çətin ki, versin. RN-nin iqtisadi siyasəti son həftələrdə bir neçə dəfə dəyişdiyinə baxmayaraq, o, Aİ-nin maliyyə qaydalarına zidd ola bilər.

Avropa Siyasət Araşdırmaları Mərkəzinin analitik mərkəzinin baş direktoru Karel Lannoonun sözlərinə görə, Avropa iqtisadiyyatının rəqabət qabiliyyətinin artırılması təşəbbüsləri - Aİ kapital bazarları birliyinin yaradılması da təhlükə altında olacaq.

“Aİ-nin problemi ondadır ki, üzv dövlətlərdən güclü dəstəyə malik olmasa, onun üçün (irəli getmək) çox çətin olacaq”, - deyə o bildirib.

Brüsseldəki bəzi diplomatlar gözləmə mövqeyi tuturlar, çünki ikinci turun nəticəsi bəlli deyil. Onlardan biri əhvali-ruhiyyəni “əsəbi, lakin sakit” kimi təsvir edib. Lakin, Şərqi Avropa ölkələrinin bəzi sakinləri Makronun Avropa Parlamenti seçkilərindəki məğlubiyyətinə cavab olaraq Avropanın gələcəyini əsassız olaraq təhlükə altına qoyduğundan böyük təşviş və narahatlıq ifadə ediblər.

“Prezident Makron şübhəsiz ki, həddinən artıq özünə güvənib”, - deyə “Reuters” yazır.