"Bugünkü oyunda bizə dəstək olan azarkeşlərə təşəkkür edirəm. Bu gün əsl futbol ab-havası var idi".

Turaztv.az AZƏRTAC-a istinadən xəbər verir ki, bu sözləri "Qarabağ" komandasının baş məşqçisi Qurban Qurbanov Avropa Liqasının 1/8 final mərhələsinin ilk oyununda Bakıda Almaniya "Bayer"i ilə 2:2 hesablı heç-heçə bitən matçdan sonra təşkil olunan mətbuat konfransında deyib.

Mütəxəssis bu görüşdə qələbəyə daha çox yaxın olduqlarını bildirib: "Oyunçularımda yorğunluq hiss olunurdu. Avropa ölkələrində rəhbərlər, futbolçular dəyişir, ancaq mexanizm dəyişmir. Bu, çox önəmli faktordur. Daha möhkəm olmaq üçün atacağımız addımlar vacibdir. Almaniya futbolu bizdən irəlidədir. İllər sonra hər hansı bir uğur qazana bilərik. Məncə, biz özümüzü inkişaf etdirməyə baxaq".

Q.Qurbanov səfərdəki matça daha ciddi hazırlaşacaqlarını söyləyib: "Futbolçularımın sağlam olması vacibdir. Böyük nəticələr əldə etmək üçün güclü rəqiblərə qalib gəlmək önəmlidir. Gələcəkdə daha yaxşı səviyyəyə çata biləcəyik".