Almaniyada təqribən 90 min ictimai nəqliyyat işçisi növbəti tətilə başlayıb.

AZƏRTAC DPA agentliyinə istinadla xəbər verir ki, bu ölkənin 80 şəhərində avtobusların, tramvay və metronun fəaliyyəti məhdudlaşdırılıb.

Almaniyanın “ver.di” həmkarlar ittifaqı tətilin təşəbbüskarı olub. Tətilçilər əmək şəraitinin yaxşılaşdırılması və 130 nəqliyyat müəssisəsi əməkdaşlarının əməkhaqqının artırılması tələblərini irəli sürüblər. Almaniyanın yalnız bir əyalətinin – Bavariya federal torpağının nəqliyyat işçiləri həmkarlar ittifaqı tətilə qoşulmayıb. Berlində isə tətil cəmi bir neçə saat davam edəcək.

Bu, artıq Almaniyada nəqliyyat işçilərinin bir həftə ərzində ikinci tətilidir. Bu yaxınlarda aeroportların təhlükəsizlik xidmətlərinin işçiləri də işi dayandırıb və bunun nəticəsində minə yaxın aviareys təxirə salınıb. Həmin tətil 200 mindən artıq sərnişinin planlarını pozub.

Vüqar Seyidov

AZƏRTAC-ın xüsusi müxbiri

Berlin