Latviya Prezidenti Edqars Rinkeviç Avropa İttifaqının (Aİ) gələn həftə Ukraynaya 50 milyard avroya yaxın məbləğdə yardımın göstərilməsi barədə razılaşmanın əldə olunmasının çox ehtimal edildiyini bildirib.

Turaztv.az AZƏRTAC-a istinadən xəbər verir ki, bu barədə “Bloomberg” agentliyi məlumat yayıb.

“Bir şey tamamilə aydındır: Ukraynanın bu pula ehtiyacı var, Ukrayna bu yardımı almalıdır və Avropa İttifaqı onu təmin etməlidir”, – deyə Rinkeviç bildirib.

Latviya Prezidenti deyib ki, bununla bağlı razılaşmada ya Aİ-yə üzv olan 27 dövlətin hamısının razılığı öz əksini tapmalıdır, ya da konsensus əldə olunmadığı təqdirdə, bu ölkəyə yardımın göstərilməsi üçün “başqa mexanizm” tələb olunacaq. Alternativ ssenari olaraq, Rinkeviç Ukrayna Silahlı Qüvvələri üçün maliyyənin tranşlar şəklində ayrılması ehtimalını qeyd edib.

Daha əvvəl Aİ ölkələrinin Ukraynaya yardım ayırmağa hazır olduqları bildirilsə də, Macarıstan bu qərarın əleyhinə çıxıb.

İttifaqa üzv dövlətlər isə Ukrayna Silahlı Qüvvələrinə maliyyə dəstəyi göstərilməsinə əngəl yaratmağa davam etdiyi təqdirdə, Macarıstanı səsvermə hüququndan məhrum edəcəklərini bildiriblər.