İranda Həmədan-Sənəndəc dəmir yolu xətti istifadəyə verilib. Bu yol Ərdəbilə, oradan da Rəşt-Astara dəmir yoluna birləşəcək.

Turaztv.az AZƏRTAC-a istinadən xəbər verir ki, bunu İranın yollar və şəhərsalma nazirinin müavini, dəmir yolu tikintisi dövlət şirkətinin rəhbəri Xeyrulla Xademi bildirib. O qeyd edib ki, bu yol İranın ixrac potensialını artırmaqla yanaşı, Şimal-Cənub Beynəlxalq Nəqliyyat Dəhlizinin də inkişafına təkan verəcək.

Qeyd edək ki, Şimal-Cənub Beynəlxalq Nəqliyyat Dəhlizi Hindistandan başlayaraq Şimali Avropaya qədər uzanır. Asiya ilə Avropanı nəqliyyat baxımından birləşdirən dəhliz yükdaşımaları üçün ən optimal marşrutdur. Hindistanın Mumbai limanından başlayan marşrut İran və Azərbaycan ərazisindən keçərək Rusiya və Avropaya uzanır. Hindistan və Cənub Şərqi Asiya ölkələrindən yüklər İranın Bəndər Abbas və Çabahar limanlarına daxil olacaq. Buradan isə Qəzvin-Rəşt-Astara (İran)-Astara (Azərbaycan) dəmir yolu ilə Rusiyaya daşınacaq. Qəzvinə qədər qatarlar Həmədan-Sənəndəc dəmir yolundan keçəcək.