Sadəliyi, səmimiliyi, təmkinliyi, nəcibliyi, ciddiliyi ilə həmişə fərqlənən Qalib Bəşirov həyatda sevimli müəllim, dərin alim, qayğıkeş valideyn, dəyərli ziyalı, etibarlı dost statusunu qazanıb. Nə qədər qəribə səslənsə də, belə insanlar haqqında danışmaq istəyəndə söz tapmaq çətinləşir.
Bu incə qəlbli insanla görüşlərimiz çox olub: İsmayıllıda, Bakıda keçirilən maraqlı tədbirlərdə, xeyirdə-şəhərdə... Hər dəfə də görüşəndə, söhbətləşəndə adam o qədər sevinir ki... Ona görə sevinir ki, qarşı tərəf olduqca mehriban, səmimi, incə xarakterli bir ziyalıdır. İnana bilmirəm və indiyədək eşitməmişəm ki, indiyədək o, kiminsə qəlbini qırsın, xətrinə dəysin. Hər dəfə görüşəndə eyni sadəliyi və səmimiyyəti ilə məni qarşılayır, hal-əhval tutur, suallar verir. Məhz elə buna görə də o, hələ ilk görüşümüzdən mehriban, xeyirxah, səmimi, zəhmətkeş və dərin biliyə malik olan bir ziyalı kimi qəlbimdə özünə yer tapıb.
İllər keçdikcə biz onunla qeyd etdiyim kimi, daha tez-tez görüşməyə başladıq və hər dəfə mən onu görəndə həmişə belə şux, şən, zarafatcıl insan təsiri bağışladığının şahidi olmuşam.
Əmək fəaliyyətim boyu müxtəlif təhsil müəssisələrində olmuş, sinif otaqlarını gəzmiş, çoxlu təcrübəli pedaqoqla həmsöhbət olmuşam. Amma indiyədək Qalib Bəşirovla müəllim-jurnalist dialoqunda ola, ondan müsahibə götürmək imkanı əldə edə bilməmişəm.Bu, mənə böyük fəaxrət olardı ki, Azərbaycanın “Əməkdar müəllimi” ilə peşəkar diskussiya aparım, təhsilimizin bu günü ilə bağlı suallar verim, illərdir direktoru olduğu Natiq Behdiyev adına İsmayıllı şəhər 6 nömrəli tam orta məktəbinin uğurları, yetirmələrinin nailiyyətləri, özünün sevincləri, problemləri ilə maraqlanım. Əldə etdikləri uğurlardan ya “İsmayıllı xəbərləri” qəzetindən, ya da feysbuk səhifəsindən xəbər tutmuşam.
Qalib müəllim məktəbdə həmişə çalışıb ki, dərslər daha səmərəli, daha faydalı, daha keyfiyyətli, daha maraqlı, daha məzmunlu olsun və buna da nail olub. İlbəil əldə etdiyi uğurlar dediklərimin bariz nümunəsidir. Onun rəhbərlik etdiyi təhsil müəssisəi nəinki İsmayıllısa, fəxarətlə deyərdim ki, Azərbaycanda nümunəvi məktəb sayılır.
Adətən müəllimlər dərsdən çıxanda, rəhbərlər də işin sonunda yorğun görünürlər. Bu Qalib müəllimə xas deyil. O, sinif otaqlarından da, kabinetindən də çıxanda sifətində məmnunluq hissi, gözlərində sevinc olur. Çünki o, insanlara nəsə öyrətməkdən həzz alır.
Müəllimlikdən xüsusi zövq alan Qalib Bəşirov şərəfli bir ziyalı ömrü yaşayıb. Bu gün onun ömrünü müdrik çağlarıdır. Bu yazını uzada bilərdim, amma vaxt baxımından nəzərə alıb geniş materialı Qalib müəllimin yubileyinə saxlayıram. Yəqin ki, onun 70-ni mənə görmək qismət olacaq. Sözün düzü, görkəmindən bu, o qədər də hiss olunmur. Bəlkə ona görə ki, o həmişə işləyib - zəhmət onu cavan saxlayıb; bəlkə heç kimə pislik etməyib, əksinə həmişə hamıya yaxşılıq edib - xislət onu cavan saxlayıb; bəlkə insanlara yaxşılığı insanlığı sevdiyi üçün eləyib - sevgi onu cavan saxlayıb; bəlkə biliyindən həmişə hamıya pay verib - dualar onu cavan saxlayıb; bəlkə hamıya hörmət və ehtiramla yanaşıb - xeyirxahlıq və mədəniyyət onu cavan saxlayıb... Belə insanlara el içində “Allah adamı” deyirlər.
Ömrünün müdriklik dövrünü yaşayan Qalib müəllim yenə öz ideyalarına, adət-ənənələrinə, düşüncələrinə uyğun yaşayır. Yenə qapını açıb sinif otaqlarına daxil olur, yenə kabinetində oturub işləyir, yenə gələcəkdə müxtəlif peşə sahibi olacaq yeniyetmələrə, eləcə də məktəbə təzə işləməyə gəlmiş gənc kadrlara məsləhət verir, yenə konfranslarda məruzə ilə çıxış edir, yenə məqalələr yazır. Bütün bunları o, vəzifə borcu kimi edir, amma bəlkə də bilmir ki məktəbdə təcrübəli və gənc müəllimlər, sinif otaqlarında şagirdlər, orta məktəbdə çalışan digər işçilər, daha dəqiq desək, kollektiv, iştirak etdiyi konfrans iştirakçıları onunla görüşdən faydalandıqları üçün həmişə onu gözləyirlər.
Bu şərəfli bir gündə - ad günündə hamı Qalib müəllimin sevincinə qoşulur, onu təbrik edir, ona cansağlığı, uzun ömür, yeni pedaqoji sahədə, təlim-tərbiyəfdə nailiyyətlər, sevincli və xoşbəxt günlər, nəvələrin xeyir işini və s. arzu edirlər. Biz də bu arzulara qoşularaq, Qalib müəllimi təbrik edirik.

Daşdəmir ƏJDƏROĞLU