AZƏRTAC-ın bölgə müxbiri xəbər verir ki, Bərdə Rayon İcra Hakimiyyətinin, Bərdə İdarəetmə və Texnologiya Kollecinin, Səfərbərlik və Hərbi Xidmətə Çağırış üzrə Dövlət Xidmətinin nümayəndələrinin, şəhid ailələrinin, qazilərin və kənd ictimaiyyətinin iştirak etdiyi tədbirdə əvvəlcə Yeni Daşkənd kəndindəki Şəhidlər abidəsi ziyarət olunub.

Tədbirdə çıxış edənlər Vətən uğrunda döyüşərək şəhadətə ucalan qəhrəman Azərbaycan əsgərinin şücaətindən və döyüş yolundan danışıblar. Bildirilib ki, Ziya Yelmar oğlu Quliyev 1973-cü il iyulun 29-da Bərdə rayonunun Yeni Daşkənd kəndində anadan olub. Orta məktəbi bitirdikdən sonra rayon hərbi komissarlığına müraciət edərək, Vətənimizin müdafiəsinə qalxıb. Laçın, Kəlbəcər bölgələrində gedən döyüşlərdə iştirak edib. 1993-cü il aprelin 2-də Kəlbəcər rayonu uğrunda döyüşlərdə şəhid olub.

Çıxışlarda Müzəffər Ali Baş Komandan İlham Əliyevin rəhbərliyi altında həyata keçirilən “Dəmir yumruq” əməliyyatı ilə torpaqlarımızın düşmən tapdağından azad olunması, Azərbaycan Ordusunun qazandığı Zəfərin mahiyyətindən də bəhs edilib.

Şəhidin anası şəhid ailələrinə göstərilən diqqət və qayğıya görə Prezident İlham Əliyevə minnətdarlığını bildirib.