Ölkələrimiz arasında aktiv qarşılıqlı fəaliyyət təkcə Azərbaycanın Qoşulmama Hərəkatına sədrliyi çərçivəsində deyil, həm də müxtəlif çoxtərəfli formatlarda həyata keçirilir. Biz Birləşmiş Millətlər Təşkilatı platformasında da, Müstəqil Dövlətlər Birliyi çərçivəsində də bir-birimizi dəstəkləyirik. Əlbəttə, ikitərəfli münasibətlər olduqca möhkəm və effektivdir, ölkələrimizin liderlərinin qarşılıqlı münasibətləri buna xüsusi çalar verir.

Bu fikirləri AZƏRTAC-a müsahibəsində Belarus Baş nazirinin müavini İqor Petrişenko deyib.

“Belarus Prezidentinin 2021-ci ilin aprelində Azərbaycana səfəri bizim münasibətlərə əlavə stimul verib, ölkələrimizin yüksəkvəzifəli şəxslərinin qarşılıqlı səfərləri və bir sıra digər tədbirlər bizim bütün sahələrdə fəaliyyətimizin inkişafına xidmət edir”, - deyə Baş nazirin müavini qeyd edib.

Azərbaycan ilə Belarus arasında diplomatik münasibətlərin 30 illiyinə toxunan İ.Petrişenko deyib: “Bu hadisəni biz çox mühüm tədbirlərlə qeyd edəcəyik. Buraya iki ölkə liderləri səviyyəsində məktub mübadiləsi, hökumətlər səviyyəsində qarşılıqlı fəaliyyət, mədəni tədbirlər aiddir. Həmçinin Belarus-Azərbaycan hökumətlərarası komissiyasının iclası nəzərdə tutulur. İclasda qarşılıqlı əlaqələrin bundan sonrakı inkişafının əsas istiqamətlərini müəyyən edəcəyik. Bugünkü sammit və hökumətin müvafiq rəhbərləri ilə sabahkı ikitərəfli görüşlər Belarus-Azərbaycan münasibətlərini daha yüksək səviyyəyə çıxarmaq imkanı verəcək”.