Bakı, 4 may, Nicat Məmmədov, AZƏRTAC UEFA Çempionlar Liqasının ilk finalçısı müəyyənləşib.

Turaztv.az AZƏRTAC-a istinadən xəbər verir ki, İngiltərənin "Liverpul" komandası UEFA Çempionlar Liqasında finala yüksəlib.

Yurgen Kloppun baş məşqçi olduğu kollektiv yarımfinal mərhələsində İspaniya "Vilyarreal"ını üstələyib.

Evdə 2:0 hesabı ilə qalib gəlmiş "qırmızılar" səfər oyununda əzmkar qələbəyə imza atıblar - 3:2.

Hesabı artıq 3-cü dəqiqədə "Vilyarreal"ın hücumçusu Bulaye Dia açıb. Matçın 41-ci dəqiqəsində Fransis Koklin fərqi artırıb.

Fasilədən sonra "Liverpul" dönüş etməyi bacarıb. Fabinyo 62-ci, Luis Dias 67-ci, Sadio Mane isə 74-cü dəqiqədə fərqlənib.

"Liverpul"un ilk rəqibi İspaniyanın "Real Madrid" və İngiltərənin "Manşester Siti" komandaları arasında keçiriləcək digər yarımfinal görüşünün qalibi olacaq.