ÇAL AŞIQ
Aşıq qardaş dərdə köklən dinləyək,
Naləsindən fəryad etsin ürəklər,
Gülməyə taqət yox, nə də ki, bir ərk,
Çal aşıq dinləsin obalar, ellər,
Çal aşıq ovunsun dərdli könüllər.

Yurdundan didərgin düşən elindən,
Ocaqda qaralan sönən közündən,
Övladdan doymayan ana gözündən,
Çal aşıq səsinə həsrətdir ellər,
Çal aşıq ovunsun dərdli könüllər.

Məzarda uyuyan körpə arzular,
Dərd çəkən sinədə qopsaq bağlayar,
Ananı övlada həsrət saxlayar,
Çal aşıq dil desin yer ilə göylər,
Çal aşıq ovunsun dərdli könüllər.

Dünyadan inciyən küsüb köç edir,
Qalmayıb təravət, qalmayıb ətir,
Vətən həsrətlini murada yetir,
Çəməni bürüsün güllər-çiçəklər,
Çal aşıq ovunsun dərdli könüllər.

Ay Şəhla, acılar ağrıdır səni,
O, qədər dərd var ki, dağladır səni,
Şəhid məzarına bağladır səni,
Kədərdən, qüssədən dolubdu gözlər,
Çal aşıq ovunsun dərdli könüllər.

Şəhla Xəlilqızı