Ramili müdafiəyə çəksək də, arxada görmürdüm, ancaq hücumda idi.

Turaztv.az AZƏRTAC-a istinadən xəbər verir ki, bunu "Qarabağ"ın baş məşqçisi Qurban Qurbanov səfərdə "Keşlə"ni 6:0 hesabı ilə darmadağın etdikləri Azərbaycan Kubokunun dörddəbir final mərhələsinin cavab oyunundan sonra mətbuat konfransında deyib.

Əlli yaşlı mütəxəssis bildirib ki, 26 yaşlı hücumçunun müdafiənin sağ cinahına keçməsi görüşün gedişatından asılı olub: “Hesab da buna imkan verirdi. Bəzi futbolçularımıza görə narahat idik. Buna görə dəyişikliklərə əl atdıq. Heç də pis alınmırdı”.

Komandasının çıxışından razı qaldığını söyləyən Qurban Qurbanov deyib: “Öz komandam üçün yaxşı oyun oldu. Heyətdə xeyli rotasiya etmişdik. Bəzi futbolçular çox istəkli idilər. Bunun da faydası çox oldu. Hesabda öndə olsaq da, nizam-intizamı qoruyub-saxlaya bildik. Komandamı təbrik edirəm. Rəqibdə yorğunluq hiss olunurdu. Bəlkə də buna görə bizim üçün asan oldu. Halbuki "Keşlə"yə qarşı matçlarımız hər zaman ağır keçib”.

“Qarabağ”dakı hər bir futbolçunun əsas heyətdə oynamağa layiq olduğunu vurğulayan baş məşqçi deyib: “Sadəcə, dəyişiklik edəndə fərqli hücumlar qurmaq lazım olur. Hər oyunçunun öz üstünlüyü var. Hamısından düzgün istifadə edə bilsək, nəticə əldə etmək olar. Amma bu cür oyunlar ilboyu olmur. İlk hissənin ortalarında oyunçularda yorğunluq var idi”.

Marsel şəhərinin eyniadlı təmsilçisinin komandası üçün ən çətin rəqiblərdən biri olduğunu qeyd edən Qurban Qurbanov deyib: “Çünki topa sahib olmağı çox xoşlayırlar. Fərdi olaraq da çox yaxşı futbolçuları var. Matçın gedişində həddindən artıq çox rotasiyalar, sistem dəyişiklikləri edirlər. Bu, demək olar ki, bizi narahat edə bilər. Həqiqətən yaxşı komandaya qarşı oynayacağıq. Layiqli mübarizə aparmaq istəyirik. “Marsel”in üstün cəhətlərini bir-bir sadalasam, kənardan elə görünər ki, sanki onlardan çəkinirik”.

Q.Qurbanov səfər matçında uğurlu nəticənin qazanılmasının mümkün olduğunu vurğulayıb: “Bu gün istənilən komanda yaxşı oyun göstərib nəticə əldə edə bilər. Amma reallığa baxsaq, rəqib hərtərəfli bizdən yuxarıdadır. Marselə yaxşı mübarizə və nəticə üçün gedirik. Hər iki matçda ən yaxşısını etməyə çalışacağıq”.

Mümkün təxribat məsələsinə də toxunan təcrübəli mütəxəssis deyib: “Bəlkə də bu şəhərdə təxribatın baş verməsi daha çox gözləniləndir. Amma inanmıram ki, müvafiq qurumlar buna şərait yaratsınlar. Dəfələrlə belə hallarla rastlaşmışıq. Lakin narahat olmaq üçün əsas yoxdur. Klub rəhbərliyi lazımi danışıqları aparır”.

Qeyd edək ki, "Qarabağ" "Marsel"ə qarşı ilk oyununu fevralın 17-də səfərdə, cavab matçını isə bir həftə sonra Bakıda keçirəcək.