UŞAQLARIN HARAYI - Təranə MƏFTUN

Xəbərlər

5.02.2022, 23:33

UŞAQLARIN HARAYI - Təranə MƏFTUN

UŞAQLARIN HARAYI.

(Doğulduqdan sonra atılan və ya yetimxanaya verilən uşaqların dilindən.)

Anacan, bilmirdim doğulmağımla,
Mən sənin boynunda yük olacağam.
Həyatın dibində boğulmağımla,
Gül kimi açmamış tez solacağam.

Bu qərib dünyada kimim var mənim?
Qaranlıq məzartək dünyam dar mənim.
Üzgünlük, tənhalıq, intizar mənim,
Dünyaya nə verib, nə alacağam?

Sən məni atsan da bir günah kimi,
Dözülməz ağrıdan qopan "ah" kimi,
Üzümə gülməyən xoş sabah kimi,
Səndən nə vaxtadək gen qalacağam?!

Ana, ana, səni çox gözləyirəm,
Ana sevgisini çox özləyirəm.
Gələni, gedəni çox izləyirəm,
Ana, sənsiz sönmüş soyuq ocağam.

Sonsuz bir eşq ilə sevirəm səni,
Ölməzdim, azacıq sevsəydin məni.
Çiçəksiz sevərmi kimsə çəməni?
Mən sənsız yarpaqsız quru ağacam.

Sənsiz yaşamaqdan bezmişəm yaman,
İsti ana qoynu arzumdur hər an.
Anasız bir dünyam var, o da viran,
Ana sevgisinə mən yaman acam!!!

Ana, sən müqəssir deyilsən ki, heç,
Yolunda mən ölüm, sən üstümdən keç.
Demirəm ya məni, ya özünü seç,
Yaş olub gözünə mən dolacağam.

Yoruldum mən sənsiz tək yaşamaqdan,
Anasız uşaqtək ad daşımaqdan,
Səndən üzr diləyir atılmış balan.
Mən sənin qulunam, sən mənim ağam,
Ana, sənsiz sönmüş soyuq ocağam.

31.01.2022 TƏRANƏ MƏFTUN