Səbahət Lənkəranlının şeirlərini misra - misra oxudum . Sonradan düşündüm ki , Səbahət xanımın şeirlərinin məcmuəsi elə onun tərcümeyi halıdır. Sanki o əbədi olmayan həyatı hamıdan çox , hamıdan fərqli sevir. Öz gözəlliyi ilə həyata gözəllik verdiyini dilə gətirib həyatla gözəllik bəhsinə düşüb. Onun şeirlərinə hopan bu duyğular onun həyata olan sevgisindən doğan duyğulardır.

Şeirlərində onun nakam sevgi yaşamağı hiss olunsa da sevgisinə qovuşmaq üçün istək və mücadiləsi təqdirə layiqdir. Səbahət xanımın yazdığı şeirlərinin tam əksəriyyəti onun nakam sevgisindən və sevgilisinə olan həsrətindən doğub. Sevgi və həsrətin şeirdə ifadə tərzinə məhdudiyyət yoxdur. Yetər ki , heca vəznində yazılan şeirlərin ədəbi qayda və şərtlərini gözləyib sözü qırmayasan.

Əsas odur ki , Səbahət xanım şeirlərində hiss və duyğularını özünəməxsus tərzdə ifadə edir , içindən gələn sözləri öz düzümündə qələmə alır. Şeirlərində kənar təsirlər və oxşamalar sezilmir. Şeir yazılışında şairin özünü ifadə tərzi mühim şərtlərdən biridir. Düşünürəm ki , Səbahət xanım şeirlərində içdən gələn hiss və duyğularını qələmə almaqla özünü ifadə edə bilib.

Şairə qələmi ilə həyata sonsuz sevgisini misra - misra kağıza hopdurub.

Həyatda heç kim şair doğulmur. İnsan dünyaya gələndən sonra həyatın müəyyən məqamında ona ilahi tərəfindən xüsusi istedad verilir. İnsan ona verilən ilahi istedadı xəmir kimi yoğura - yoğura püxtələşir , mükəmməl olur. Bu baxımdan inanıram ki , oxucular Səbahət xanımın şeirlərini sevə - sevə oxuyacaq .

İsmayılova Səbahət Kərim qızı , 1971 - ci il , may ayının 14 də Lənkəran şəhərində anadan olmuşdur.

Məktəb yaşlarından ictimai işlərdə fəallıq göstərən Səbahət İsmayılova kiçik yaşlarından poeziya vurğunudur. Bu vurğunluq onda Azərbaycan dili və ədəbiyyatı müəlliməsi olmaq arzusu yaratsa da buna nail ola bilməmişdir. " Məktəbəqədər müəssisələrdə tərbiyəçi " ixtisasına yiyələnmişdir. 1991 - ci ildən Lənkəran uşaq bağçasında tərbiyəçi vəzifəsində çalışır.

Səbahət İsmayılova " Qızıl Qələm " və " Azərbaycan bayrağı " media mükafatı laureatıdır.

Lənkəranlı təxəllüsü ilə şeirləri vasitəsilə Lənkəranı təmsil edir.

" Əllərin yetməyən bir mələyəm mən " adlı , 1 kitabın müəllifidir.

Bu da 2-ci kitabıdır.

Ailəlidir. İki qız övladı var.

Mən də Səbahət xanıma davamlı uğurlar arzulayıram.

İMAN ABDULLA.
Azərbaycan Yazıçılar Birliyinin üzvü.