Bədən sağlam olsa, saf olar söz də.
Süst adam süst olar, bədəndə, sözdə,
Həkim xəstələrə eyləyər əlac,
Xəstələnsə, olar özgəyə möhtac.
Nizami Gəncəvi.

Məqaləyə dahi Nizamidən gətirdiyim bu iqtibasla başlamağımınn bünövrəsində, gecə-gündüz insan sağlamlığının keşiyində duran təbiblərin cəmiyyətdə tutduqları mövqe və onlara olan insani münasibətləri müəyyən etmək və bunun hansı səviyyədə olmasını öyrənmək dayanır.

Əgər dünyanın müxtəlif dövlətlərinə qiyabi və qısa ekskursiya etmiş olsaq, görərik ki, hər bir ölkənin səhiyyə sistemi onun iqtisadi, elmi potensialına uyğun olaraq formalaşıbdı. Sözsüz ki, Azərbaycan burda istisna təşkil edə bilməz. Məhz, bu nöqteyi-nəzərdən çıxış edərək bir çox ölkələrlə müqayisədə özümüzü xoşbəxt hesab edə bilərik. Nazirlər Kabinetinin son iclasında Azərbaycan Respublikasının Prezidenti cənab İlham Əliyevin dediyi fikirlər bunun böyük həqiqət olduğunu bir daha təsdiqlədi.



O, dedi: Azərbaycanda “640-dan çox tibb müəssisəsi tikilib və yenidən qurulub. Demək olar ki, indi bizim bütün şəhərlərimizdə,-bir neçə şəhəri istisna etmək şərtilə, orada da yaxın zamanlarda bu işlər görüləcək,-ən müasir avadanlıqlarla təchiz edilmiş xəstəxanalar var. Bakı şəhərində səhiyyə sahəsində çox böyük işlər görülüb, yeni xəstəxanalar, tibb müəssisələri yaradılıb”.

Cənab Prezidentin dediklərinə əsaslanaraq tam əminliklə Akademik Mirqasımov adına Respublika Klinik Xəstəxanasını buna misal göstərə bilərik. Xeyli vaxt idi ki, bu xəstəxananın tibbi xidmətindən istifadə etmirdim. Həyat elə gətirdi ki, bu yaxınlarda bu xəstəxananın həkimlərinə müraciət etməli oldum. Bəri başdan demək istəyirəm ki, gördüklərim məni valeh və heyran etdi, birsözlə, cənab Prezidentin dediklərinin faktiki nümunəsini burda gördüm.

Xəstəxananın müasir səviyyədə yenidən təmir olunması, müasir lift sisteminin xəstələrin tələbatına tam cavab verməsi, işıqlı, həmçinin duş ilə təmin olunan palataların mövcudluğu, kabinələrin çağdaş tələblərə cavab verən yeni tibbi avadanlıqlarla təmin olunması, yüksək səviyyəli həkim və tibb bacılarının diqqət və qayğısı, xəstələrin gündə üç dəfə keyfiyyətli isti yeməklə və iyirmi dörd saat qaynar çayla təmin olunması, dövlət hesabına dərman-preparatlarının təminatı və xəstəxananın yaşıllığa qərq olan həyəti, sanki xəstəxananı sanatoriya səviyyəsinə qaldırır. Bütün bunlar Azərbaycan dövlətinin bu günkü reallığından xəbər verir.



Akademik Mirqasımov adına Respublika Klinik Xəstəxanasının bu yüksəlişə nail olmasında, öz istedadı, fədakar əməyi, vətəndaşlara olan xüsusi məhəbbəti, yüksək insani keyfiyyətləri ilə seçilib-sayılan Baş həkim cənab Telman İbadovun xüsusi xidmətləri var. Onu dəyərləndirməmək qeyri mümkündü və bizim imkanlarımız xaricindədi.

Xəstəxana ilə bağlı ümumi sualı cavablandıran cənab Telman İbadov bunları dedi: “Məlumat üçün bildirim ki, Respublika Klinik Xəstəxanasında 2 ədəd generator (450-490 mq gücündə) var. Ümumiyyətlə, bizim xəstəxanada təmirdən sonra palatalar 2 nəfərlikdi, həm dəhlizdə, həm də palatalarda çoxlu soyuducu aparatlar qoyulmuşdu. Hər bir otaqda sərinlənmək üçün duşlar var. 24 saat müddətində şöbə isti və soyuq su ilə təmin olunur. Elektrik sistemində baş verən qəza zamanı bizim xəstəxanada mövcud olan iki generator avtomatik olaraq işə düşmüş və bütün müəssisəni elektrik enerjisi ilə təmin etmişdi. Onu da qeyd edim ki, məlum enerji qəzası zamanı-işıq olmayan gecə bizim xəstəxanada 3 nəfər əməliyyat və 3 doğuş, reanimasiyada isə 50-yə yaxın xəstə olub, onların bəziləri oksigen təminatındadı, süni tənəffüs aparatına qoşulublar. Yeni doğulmuşlar küveyz aparatında saxlanılır. Xəstəxananın reanimasiya şöbələrində, doğum evində, əməliyyat blokunda, liftlərdə 24 saat müddətində, fasiləsiz enerji vardı ki, bu da ümumi işin pozulmamasına səbəb olur”.



Xəstəxanada müalicə aldığım müddət ərzində, bir jurnslist kimi, həm “Endokrinologiya şöbəsi”ndə, həm də başqa şöbələrdə müalicə alan çoxsaylı xəstələrlə tanış oldum, xəstəxana, həkim heyəti, müalicə və s. haqqında ümumi söhbət apardıq.

Belə bəlli oldu ki, hamı xəstəxananın işindən, aparılan müalicələrdən, göstərilən diqqət və qayğıdan çox razıdı. Həkim, həmçinin tibb bacıları haqqında eşitdiklərim məni bir daha juxarıda sitat gətirdiyim kəlamın bir beytinə müraciət etməyə məcbur etdi,-

Həkim xəstələrə eyləyər əlac,
Xəstələnsə, olar özgəyə möhtac.

Bu fəlsəfi məntiqə istinad edərək söyləyə bilərəm ki, biz də tibb işçilərinə diqqət və qayğı ilə yanaşmalı, onlara şərəfli peşələrini yerinə yetirməkdə kömək olmalıyıq. Çünki bizim hər birimizin sağlamlığının keşiyində onlar dayanır...