Dünya Azərbaycanlılarının Mədəniyyət Mərkəzinin (DAMM) Prezidenti, Sabitlik və İnkişaf Mərkəzi İctimai Birliyinin (SİM İB) rəhbəri Rasim Məmmədovun ailəsində ağır itki baş vermişdir. Əziz qohumu və qudası, dəyərli insan Nurəddin Əhmədov 69 yaşında, səhər saat 5 radələrində dünyasını dəyişmişdir.
Qeyd edək ki, Nurəddin Əhmədov 3 il əvvəl dünyasını dəyişən İbrahim Əhmədovun kiçik qardaşı idi. Əslən Qərbi Azərbaycanın Vedibasar vilayətinin Şirazi kəndindən olan Nurəddin Əhmədov ziyalı ailəsində dünyaya göz açmışdı. O, ailəsindən aldığı mənəvi dəyərləri ömrü boyu qoruyaraq insanlara hörmət və səmimiyyətlə yanaşmışdır.

Nurəddin Əhmədov həyatı boyu ətrafındakı insanların sevgisini və hörmətini qazanmış, səmimiyyəti, mehribanlığı, insanlara qayğı ilə yanaşması və dostluğa sədaqəti ilə seçilmişdir. Onun çoxsaylı dostları, tanışları və həmkarları var idi. Hər biri ilə münasibətində özünəməxsus səmimiyyət yaradan Nurəddin Əhmədov onu tanıyanların yaddaşında dəyərli və əvəzsiz bir insan kimi qalacaq.

DAMM və SİM İB üzvü kimi də aktiv fəaliyyət göstərmişdir. Onun üçün insanlarla bir arada olmaq, xoş söz demək, ehtiyacı olan insana mənəvi dayaq olmaq sadəcə bir vəzifə deyil, həyatının bir parçası idi. Xalqına bağlılığı, doğma Vətəninə sevgisi və insanlara olan xoş münasibəti onu tanıyanların qəlbində xüsusi yer qazandırmışdı.

Nurəddin Əhmədov müxtəlif tədbirlərdə iştirak edir, ölkənin ayrı-ayrı bölgələrinə səfərlərdə həmrəyliyimizi və birlik ruhumuzu yaşadan görüşlərdə fəal yer alırdı. Xüsusilə Vətən müharibəsi veteranları ilə söhbətlərində onlara mənəvi və ruhani dəstək göstərməyə, qayğı və diqqətini əsirgəməməyə çalışırdı. Vətəninə və xalqına olan sevgisini əməli fəaliyyəti ilə göstərirdi.

Nurəddin Əhmədov artıq aramızda olmasa da, onun xoş söhbətləri, səmimi münasibəti, dostluğu və insanlara göstərdiyi diqqət uzun müddət yaddaşlarda yaşayacaq. Bəzi insanlar həyatdan köçəndə yalnız ailəsi deyil, böyük bir dost çevrəsi də onların yoxluğunu hiss edir. Nurəddin Əhmədov da belə insanlardan idi.

Bu ağır itki ilə əlaqədar mərhumun ailəsinə, doğmalarına, yaxınlarına, dostlarına və onu sevən hər kəsə dərin hüznlə başsağlığı verir, Uca Allahdan onlara səbir və dözüm diləyirik.

Nurəddin Əhmədovun əziz xatirəsi daim qəlblərdə yaşayacaq.
Allah rəhmət eləsin. Məkanı cənnət, ruhu şad olsun.

DAMM, SİM İB üzvləri
və şəxsən Rasim Məmmədov