Lütfəli Abdullayevin ciddi bir xəstəliyi olmayıb. Hərdən şəkəri qalxarmış o qədər... Həkim ona pəhriz saxlamağı məsləhət görüb ki, şəkər normanı keçməsin. Bir də ürəyində ara-sıra ağrılar olarmış... Amma ötəri, çox incitməyən...
O gecə saat 1-ə işləmiş aktyor ürək ağrısından şikayət edəndə əvvəl elə biliblər ki, yenə şəkəri qalxıb. "Təcili yardım" çağırıblar. Şəmsi Bədəlbəyli Moskvaya zəng vurub ki, təyyarə göndərsinlər, aktyoru təyyarə ilə Kreml xəstəxanasına aparsınlar, amma ölüm elə ani gəlib ki, təyyarə o sürətə çata bilməyib. Gec olub.Sonradan məlum olub ki, o gecə ağrılar nə ürəyindən, nə də şəkər xəstəliyindən imiş. Aktyorun beyninə qan sızıbmış. İki gün sonra Sevda xanımın doğum günü idi. Sevda xanım ad gününü qeyd etmək istəmirmiş, Lütfəli Abdullayev isə elə hey deyirmiş ki, mən sənin ad gününü qeyd edəcəyəm, bütün Bakını yığacağam evə. Həqiqətən də, böyük aktyorun dediyi kimi də olub. İki gün sonra bütün Bakı Lütfəli Abdullayevun evinə yığışmışdı. Amma Sevda xanımın doğum gününü qeyd etmək üçün yox, aktyorun özü ilə vidalaşmaq üçün. Həmin gündən sonra Sevda Pepinova bir də heç vaxt öz ad gününü qeyd etmədi... Beləcə, Lütfəli Abdullayev 1973-cü il dekabrın 9-da dünyasını dəyişdi.

Ramila Qurbanlı