"Depressiya zamanı insanın özünü süni şəkildə şən göstərməsi əksər hallarda daxili sıxıntıları ilə başqalarına yük olmaq istəməməsindən irəli gəlir".

Bu barədə gazeta.ru-ya rusiyalı psixoloq-hipnoterapevt Aleksey Şestakov məlumat verib.

Ekspertin sözlərinə görə, depressiyadan əziyyət çəkən şəxslər öz çətinliklərinin miqyasını başqalarının problemləri ilə müqayisədə kiçiltməyə və dəyərsizləşdirməyə meyilli olurlar. Məhz bu səbəbdən əsl hissləri pərdələmək üçün şən və gülərüz mənzərə yaradılır ki, buna da elmdə "gülərüz depressiya" deyilir. Belə davranışın digər bir səbəbi isə gerçək duyğularını büruzə verəcəyi təqdirdə cəmiyyətdən təcrid olunmaq və tək qalmaq qorxusudur.

Psixoloq qeyd edir ki, hisslərin bu cür gizlədilməsi son nəticədə vəziyyəti daha da ağırlaşdırır. Çünki insan gerçək emosional halını nə qədər uzun müddət ört-basdır edərsə, bu saxta imici qorumaq üçün bir o qədər çox enerji sərf edir. Nəticədə, depressiv əlamətlərlə mübarizə aparmaq üçün onun gücü qalmır.

"Əgər ətrafınızdakı insan qəflətən sevdiyi məşğuliyyətlərdən uzaqlaşırsa, səbəbsiz yerə evə qapanıb ünsiyyətdən qaçırsa, bu, narahatlıq üçün əsasdır. Eyni zamanda, əvvəllər müşahidə olunmayan bədbin mövzularda söhbətlər etmək və ya əksinə, qeyri-təbii dərəcədə həddindən artıq şən görünmək də təhlükə siqnalı ola bilər. Belə hərəkətlər insanın öz daxili ağrılarını gizlətməyə çalışdığını göstərir", - deyə mütəxəssis vurğulayıb.

Bundan əlavə, təbiətcə sakit olan birinin anidən səbəbsiz yerə ətrafdakılara qarşı aqressiya nümayiş etdirməsi də diqqətdən qaçmamalıdır.

Psixoloqun fikrincə, depressiv hallar özünü qəzəb formasında da göstərə bilər ki, bu da "qəzəbli depressiya" adlanır.

"Tükənmə sindromuna gəldikdə, bu hal işdən və ya yorucu fəaliyyətdən uzaqlaşıb aktiv istirahətə keçdikdə azalır və ya tamamilə keçib gedir. Anlamaq lazımdır ki, sadəcə uzanmaqla edilən passiv istirahət tükənməyə qarşı kömək etmir, çünki bu, insana yeni təəssüratlar qazandırmır. Lakin depressiya zamanı vəziyyət belə deyil və sağalma tükənmə sindromundakı kimi sürətlə baş vermir. Depressiyanın müalicəsində davranış aktivasiyası tətbiq olunur, yəni xəstə əvvəllər zövq aldığı işləri görməyə təşviq edilir. Ancaq bu proses yalnız mütəxəssis nəzarəti altında effektiv olur və müsbət irəliləyişlər olduqca ləng gedir", - deyə o fikrini yekunlaşdırıb.