Yaradıcılığa başladığı ilk illərdə çəkdiyi ilk rəsmi sadəcə iki qutu siqaret qiymətinə satan sənətkarın əsərləri, illər sonra milyonlarla lirə dəyərində hərraca çıxarılır. 20-ci əsrin ən qiymətli sənətkarları arasında yer alan bu şəxsin ilk əsərinin satışa təqdim olunacağı hərrac zamanı, onun 120-dən çox digər əsərinin də nümayiş etdirilməsi gözlənilir.

Kolumbiyalı əfsanəvi rəssam Fernando Boteronun sənət dünyasına ilk addımını atdığı həmin məşhur əsər onilliklər sonra yenidən gün işığına çıxıb. Hələ 17 yaşındaykən iki qutu siqaret qarşılığında əldən çıxardığı "La Plegaria" tablosu bu gün Boqotadakı nəhəng hərracın baş qəhrəmanıdır.

Dünyanın ən çox tanınan Latın Amerikalı sənətkarlarından biri olan Fernando Botero 2023-cü ildə 91 yaşında vəfat edərək özündən sonra nəhəng miras qoyur. Lakin bu mirasın ilk halqası olan 1949-cu il təvəllüdlü "La Plegaria" (Dua) sulu boya tablosu rəssamın karyerasındakı ən təvazökar mübadilənin predmeti idi. Botero o dövrdə bu əsərini kolumbiyalı Efren Ossaya sadəcə iki qutu siqaret müqabilində vermişdi.

21 mayda "Bogotá Auctions" tərəfindən satışa çıxarılan bu tablo rəssamın vizit kartına çevrilən o məşhur "şişirdilmiş həcm" və "nəhəng fiqur" (botiromizm) üslubundan olduqca uzaqdır. Hərrac evi rəsmiləri bildirirlər ki, bu əsər Boteronun formalaşma dövrünə aiddir və sonrakı illərdə dünyanı fəth edəcək o ikonik bədən formalarının axtarışı hələ bu fırça zərbələrində özünü büruzə vermir.

Tabloda əllərini bərk-bərk sıxaraq dua edən yaşlı bir kəndli və onun arxasında qorxu dolu gözlərlə göyə baxan uşaqlı bir qadın təsvir olunub. Əsər Kolumbiya tarixinin ən qanlı dövrlərindən biri sayılan liberal lider Xorxe Eliyeser Qaitan qətlindən cəmi bir il sonra çəkildiyi üçün, dövrün ictimai qorxu və xofunu da özündə əks etdirir.

Bu gün əsərləri dünyanın ən nüfuzlu meydanlarını və muzeylərini bəzəyən Botero üçün "La Plegaria" bir dahinin uşaqlıq addımlarını təmsil edir. Sığorta hüququnun qabaqcılı Efren Ossa ilə edilən o tarixi mübadilə bu gün sənət bazarında milyonlarla dollarla ölçülən "Botero Dəyəri" ilə dramatik bir təzad təşkil edir.

70 ildən çox bir müddətdən sonra yenidən bazara çıxan bu tablo kolleksionerlər üçün sadəcə bir sənət nümunəsi deyil, həm də böyük bir uğur hekayəsinin başlanğıc nöqtəsi kimi qəbul edilir.