"Əgər öskürək 21 gün ərzində keçmirsə, bu, bir çox xəstəliklərin, o cümlədən xərçəng və ya vərəmin də göstəricisi ola bilər".


Bu barədə rusiyalı həkim-terapevt Yana Fomina "Gazeta.ru" nəşrinə müsahibəsində danışıb.

"Əgər öskürək sizə artıq üç həftədir əziyyət verirsə, aptekdən "öskürəyə qarşı nəsə" almayın. Terapevt qəbuluna yazılın, flüoroqrafiya (döş qəfəsi orqanlarını aşağıdozalı rentgenlə vizuallaşdıran sürətli skrininq metodu - red.) edin, ümumi qan analizi və C-reaktiv zülal (iltihab markeri) analizləri verin. Əgər leykositlər sayı və eritrositlərin çökmə sürəti normaldırsa, orqanizmdə iltihab yoxdur. Əgər yüksəlirsə, o zaman həkim müvafiq antibakterial terapiya təyin edəcək. Əgər rentgen şəkli aydındırsa, lakin öskürək davam edirsə, terapevt sizi LOR həkiminə və qastroenteroloqa yönləndirəcək. Əgər rentgendə tünd ləkə görünübsə, təşvişə düşməyin. 70% hallarda bu, uzun müddət davam edən pnevmoniyanın göstəricisidir. 20%-də vərəmdir. 10%-də isə onkologiyadır ki, bu da erkən mərhələlərdə müalicə edilə bilər", - deyə Yana Fomina qeyd edib.


Həkim əlavə edib ki, bəzən öskürək uzun müddət davam edir, lakin rentgen müayinəsi ideal olur, həkim isə nəfəsalma zamanı ağciyərlərdə bronxit və ya pnevmoniya üçün xarakterik olan "fit səsini" eşitmir. Bu halda öskürəyin səbəbi ağciyərlərdə deyil, digər orqanlardadır.


"Məsələn, öskürəyin səbəbi burun boşluğundan gələn axıntı (rinit, sinusit) ola bilər. Burundan gələn selik boğazın arxa hissəsindən axır və səs tellərini qıcıqlandırır. Bu zaman ağciyərləri deyil, burnu müalicə etmək məsləhətdir (duzlu məhlullarla yaxalama, kortikosteroid spreyləri). Öskürəyin digər səbəbi isə qastroezofageal reflüks xəstəliyidir. Mədədən çıxan xlorid turşusu qida borusuna və traxeyaya axır və spazmlara səbəb olur. Bəzən öskürəyə dərmanlar da səbəb ola bilər. Əgər qan təzyiqi üçün enalapril, lizinopril və ya perindopril qəbul edirsinizsə, quru öskürək onların yan təsiri ola bilər", - deyə həkim əlavə edib.


Bundan əlavə, uzun müddət davam edən öskürək siqaret çəkmək, zərərli sahədə işləmək, allergiya, astma, xroniki obstruktiv ağciyər xəstəliyi və digər amillərdən də qaynaqlana bilər.