İslam İnkişaf Bankı (IsDB) Qrupu üzv ölkələrimizdə iqtisadi inkişafı və sosial tərəqqini dəstəkləmək missiyasına sadiq qalır.

“APA-Economics” xəbər verir ki, bunu İslam İnkişaf Bankı Qrupunun İllik Toplantılarına hazırlıqlar çərçivəsində İslam İnkişaf Bankı Qrupunun Azərbaycanda Özəl Sektor üzrə Təqdimatı zamanı İnvestisiya və İxrac Kreditlərinin Sığortalanması üzrə İslam Korporasiyasının (ICIEC) Biznesin İnkişafı Departamentinin direktoru Yasser Alaki deyib.

O qeyd edib ki, bu missiyanın mərkəzində özəl sektorun innovasiya, iş yerlərinin yaradılması və davamlılığın hərəkətverici qüvvəsi kimi həyati rolu dayanır:

"Azərbaycan investisiya və tərəfdaşlıq üçün dinamik və perspektivli bir mühit təqdim edir. Strateji coğrafi mövqeyi, böyüyən iqtisadiyyatı və diversifikasiyaya olan sadiqliyi ilə ölkə infrastruktur, energetika, kənd təsərrüfatı, loqistika və sənaye kimi sektorlarda mühüm imkanlar vəd edir".