ABŞ Hörmüz boğazında minaların təmizlənməsi üçün pilotsuz yerüstü və sualtı nəqliyyat vasitələrindən istifadə edir.

AZƏRTAC xəbər verir ki, bu barədə “The Wall Street Journal” qəzeti məlumat yayıb.

Nəşrin məlumatına görə, ABŞ ordusu mina təmizləmə əməliyyatlarında həm gəmilərdən, həm də dronlardan istifadə edir. Bildirilir ki, yerüstü və sualtı pilotsuz vasitələr mina təmizləmə imkanlarının getdikcə daha mühüm hissəsinə çevrilir və ənənəvi minaaxtaranları tədricən əvəz edir.

Qəzet vurğulayır ki, son illərdə ABŞ ordusunun mina axtarışı və zərərsizləşdirmə imkanları müəyyən qədər azalıb, baxmayaraq ki, müxtəlif texniki vasitələr mövcuddur. Digər aktivlərlə yanaşı, ABŞ ordusu RTX şirkəti tərəfindən hazırlanmış və AQS-20 sonar sistemi ilə təchiz olunmuş yerüstü drondan istifadə edir. Bundan əlavə, dəniz dibində minaların aşkar edilməsi üçün MK18 Mod 2 “Kingfish” və “Knifefish” tipli sualtı dronlardan da istifadə olunur.

Nəşr qeyd edir ki, minalar aşkar edildikdən sonra onların məhv edilməsi üçün pilotsuz uçuş aparatlarından da istifadə oluna bilər.