Səudiyyə Ərəbistanının Enerji Nazirliyi Yaxın Şərq müharibəsində zərər görmüş və gündəlik 700 min barel neft axını itkisi yaşayan Şərq-Qərb neft kəmərinin tam gücü ilə bərpa olunduğunu və bəzi istehsal yataqlarında işlərin davam etdiyini açıqlayıb.

AZƏRTAC “Saudi Gazette” nəşrinə istinadla xəbər verir ki, Enerji Nazirliyinin yazılı açıqlamasında deyilir: “Aprelin 9-da ictimaiyyətin diqqətini cəlb edən hücumlar nəticəsində Şərq-Qərb boru kəmərindəki nasos stansiyalarından biri zədələnib və nəticədə gündəlik təxminən 700 min barel neft axını itkisi baş verib”.

Nazirlik bildirib ki, aparılan texniki və əməliyyat işləri nəticəsində boru kəməri tez bir zamanda gündə təxminən 7 milyon barel tam nasos gücünü bərpa edib. Həmçinin qeyd edilib ki, hücumlar səbəbindən Munifə yatağında təxminən 300 min barel gündəlik istehsal itkisi kompensasiya edilib və Hureyş yatağında işlərin tam istehsal gücünə qayıtması davam edir.

Açıqlamada deyilir: “Enerji infrastrukturundakı sürətli bərpa ölkənin yüksək əməliyyat dayanıqlığını və böhranları idarəetmə qabiliyyətini nümayiş etdirir ki, bu da qlobal enerji təchizatının etibarlılığını dəstəkləyir”.