Amerikanın “OpenAI” şirkəti Şimali Atlantika Müqaviləsi Təşkilatı (NATO) ilə müqavilə bağlamağı nəzərdən keçirir. Bu barədə çərşənbə axşamı bir neçə xarici media orqanı startapın ABŞ Müdafiə Nazirliyi ilə razılaşmasından sonra məlumat verib.

AZƏRTAC “The Wall Street Journal”a istinadla xəbər verir ki, “OpenAI” şirkətinin baş direktoru Sem Altmanın sözlərinə görə, hazırda texnologiyaların bütün qapalı NATO şəbəkələrində yerləşdirilməsi imkanları araşdırılır. “OpenAI” nümayəndəsi daha sonra bunun Alyansın açıq şəbəkələrinə aid olduğuna aydınlıq gətirərək Altmanın sözlərinin təhrif olunduğunu qeyd edib.

“Reuters” agentliyi məlumat verib ki, şirkət öz süni intellekt texnologiyasını NATO-nun açıq şəbəkələrində yerləşdirmək üçün müqavilə bağlamağı nəzərdən keçirir.

Ötən həftə “OpenAI” şirkəti ABŞ Müdafiə Nazirliyinin qapalı şəbəkəsində süni intellekt texnologiyalarını yerləşdirmək üçün Pentaqon ilə razılaşma əldə olunduğunu elan edib. Medianın məlumatına görə, qərar Vaşinqtonun “təchizat zənciri riski” hesab etdiyi “Anthropic” ilə fikir ayrılığından sonra verilib. “Anthropic”in xaric edilməsi bu şirkətin süni intellekt modellərinin kütləvi daxili nəzarət və ya tam muxtar ölümcül silahlara nəzarət üçün istifadəsinə icazə verməkdən imtina etməsi ilə əlaqədardır.

WSJ-nin məlumatına görə, Sem Altman Pentaqon ilə razılaşmanı müdafiə edərək bildirib ki, bu müqaviləni imzaladığına görə peşman deyil. O, həmçinin qeyd edib ki, müqavilə haqqında məlumatın bu qədər tez açıqlanmamasını üstün tutardı, çünki bu, “fürsətçi addım” kimi görünə bilər.

ABŞ Müdafiə Nazirliyi ilə bağlanan müqaviləyə qarşı tənqidlər fonunda “OpenAI” bəzi istifadəçilərin reaksiyası ilə üzləşib. Analitik şirkət “Sensor Tower”ə görə, şənbə günü ChatGPT mobil tətbiqinin silinmə halları bir əvvəlki günlə müqayisədə 295 faiz artıb.

“OpenAI” şirkəti “Microsoft”, “Nvidia” və “SoftBank” daxil olmaqla bir çox böyük texnologiya nəhəngi tərəfindən dəstəklənir.