Nəsimi Rayon İcra Hakimiyyətində rayon ərazisində fəaliyyət göstərən ali təhsil müəssisələrinin rəhbərləri ilə görüş keçirilib.

"Turaztv.az" "Unikal" -a istinadən xəbər verir ki, görüşdə Azərbaycan Dillər Universitetinin rektoru Kamal Abdulla, Azərbaycan Tibb Universitetinin rektoru Gəray Gəraybəyli, Bakı Slavyan Universitetinin rektoru Anar Nağıyev, Azərbaycan Dövlət Neft və Sənaye Universitetinin rektoru Rüfət Əzizov, Bakı Qızlar Universitetinin rektoru Sevinc Rəhimova, Bakı Musiqi Akademiyasının prorektoru Yeganə Axundova, Azərbaycan-Fransa Universitetinin direktoru Vazeh Əsgərov və Azərbaycan Milli Konservatoriyası nəzdində Musiqi Kollecinin direktoru Nazim Kazımov iştirak ediblər.

Rayon İcra Hakimiyyətinin başçısı Tahir Budaqov çıxışında ali təhsil müəssisələrinin rayonun ictimai həyatında mühüm rol oynadığını vurğulayıb, gənclərin vətənpərvərlik ruhunda formalaşdırılması və onların sosial layihələrə cəlb olunmasının əhəmiyyətini qeyd edib. Bildirilib ki, icra hakimiyyəti tərəfindən həyata keçirilən sosial-iqtisadi və mədəni-kütləvi tədbirlərdə ali təhsil ocaqlarının fəal iştirakı xüsusi önəm daşıyır.

Görüşdə iştirak edən rektorlar çıxış edərək rəhbərlik etdikləri ali təhsil müəssisələrində həyata keçirilən elmi, tədris və sosial layihələr barədə məlumat verdilər. Onlar tələbələrin ictimai fəallığının artırılması, könüllülük hərəkatının genişləndirilməsi, elmi-praktik konfransların, maarifləndirici və mədəni-kütləvi tədbirlərin birgə təşkili istiqamətində əməkdaşlığın əhəmiyyətini vurğuladılar.

Çıxış edənlər yerli icra hakimiyyəti ilə qarşılıqlı fəaliyyətin daha da gücləndirilməsinin vacibliyini qeyd edib, birgə layihələrin həyata keçirilməsi üçün təkliflərini səsləndiriblər.

Sonda qarşılıqlı maraq doğuran məsələlər ətrafında geniş fikir mübadiləsi aparılıb, gələcək əməkdaşlıq istiqamətləri müəyyənləşdirilib və birgə fəaliyyətin davamlı xarakter daşıyacağı bildirilib.