"Azərbaycanla Ermənistan arasında ötən ilin avqustun 8-də Vaşinqtonda əldə edilmiş sülh sazişi ABŞ Prezidenti Donald Trampın gündəliyində əsas yer tutur".

APA-nın yerli bürosu xəbər verir ki, bunu Gürcüstanın xarici işlər naziri Maka Boçorişvili "İmedi" telekanalına müsahibəsində deyib.

Nazir qeyd edib ki, ABŞ-ın vitse-prezidenti Ceyms Devid Vensin Azərbaycan və Ermənistana səfərləri bu sazişin bir növ davamı olub.

"Vensin uzun müddətdir davam edən münaqişəyə son qoyan iki Cənubi Qafqaz ölkəsinə səfəri bunun nümayişi oldu", - Boçorişvili əlavə edib.

Qeyd edək ki, Ceyms Devid Vens 9-11 fevral tarixlərində rəsmi səfərlə Ermənistan və Azərbaycanda olub. Bəzi gürcü politoloqların fikrincə, Vensin Gürcüstana səfər etməməsi ölkənin Qərbdən üz döndərməsi ilə əlaqəlidir.