Bosniya və Herseqovinanın Rəyasət Heyətinin serbiyalı üzvü xanım Jelka Tsviyanoviç ABŞ Prezidenti Donald Trampın Nobel Sülh Mükafatına namizədliyinin irəli sürülməsi ilə bağlı Rəyasət Heyətinə təşəbbüs göndərib.

AZƏRTAC xəbər verir ki, Jelka Tsviyanoviç Donald Trampın ikinci prezidentliyi dövründə diplomatik fəaliyyəti və şəxsi nüfuzu ilə beynəlxalq münasibətlərdə mühüm iz qoyan nəticələr əldə etdiyini və çoxsaylı dünya böhranlarının sabitləşməsinə mühüm töhfə verdiyini bildirib. O vurğulayıb ki, ABŞ Prezidenti Ermənistan və Azərbaycan arasında Ağ Evdə imzalanmış sülh sazişi ilə Cənubi Qafqazda uzun müddətdir davam edən münaqişəyə son qoyub, regional əməkdaşlıq və təhlükəsizliyin yeni dövrünün perspektivini açıb.

Jelka Tsviyanoviç qeyd edib ki, Donald Tramp, həmçinin Hindistan ilə Pakistan, Tailand və Kamboca, eləcə də Ruanda ilə Konqo Demokratik Respublikası arasında münaqişələrə son qoyub, Yəməndə bağlanan atəşkəs sazişi ilə Qırmızı dəniz regionunda gərginliyin dayandırılmasına və humanitar fəaliyyət üçün şəraitin yaradılmasına kömək edib. O, ABŞ Prezidentinin Avropada sülhün əldə edilməsi səylərində əvəzsiz rolunu və Yaxın Şərqdə sülh təşəbbüsləri və innovativ yanaşmasının əhəmiyyətini vurğulayıb.

Qeyd edək ki, Bosniya və Herseqovinanın Rəyasət Heyətinin iclası avqustun 25-də Sarayevoda keçiriləcək.

Xatırladaq ki, avqustun 8-də Ağ Evdə ABŞ Prezidenti ilə görüşdə Azərbaycan Prezidenti İlham Əliyev Donald Trampın Nobel Sülh mükafatına layiq görülməsi üçün Nikol Paşinyanla birgə Nobel komitəsinə müraciət etməyi təklif edib.